ОЧЛ-2021. "Кавасаки Фронтале" бош мураббийи Тору Онике: "Ички чемпионатдаги муваффақиятларимизни ОЧЛда ҳам давом эттиришга ҳаракат қиламиз"

"Олдиндаги баҳсда фақат ғалаба ҳақида ўйламоқдамиз. Биринчи учрашувни фойдамизга ҳал қилдик. Бор эътиборимиз "Бейжинг Гоан" билан ўйинга қаратилган. Бошқа нарса ҳақида ўйлаётганимиз йўқ. Умид қиламизки, навбатдаги ўйинда ўйлаган мақсадимизга эришамиз",- дейди Тору Онике.

"Мураббийимизнинг фикрларига қўшиламан. Ушбу баҳсда уч очкони ўз ҳисобимизга ёздириб қўйишга ҳаракат қиламиз",- дейди Ю Кобаяши.

- Ҳар уч кунда ўйинлар бўлиши қай даражада қийинчилик туғдирмоқда?

- Қисқа муддатда боз устига юқори ҳароратда ўйинлар ўтказиш албатта таъсир қилади. Барибир вазиятдан келиб чиқиб иш қилишимиз керак бўлади. 

- Саволим футболчига. Ўйиндан олдин рақибни осон ютамиз, деган фикр йўқми

- Рақибнинг таркибида ёш футболчилар бўлсада, майдонга ғалабага чанқоқ бўлиб майдонга тушишади. Биз ҳам худди шундай жангга тайёрмиз. Майдоннинг ҳар бир қаричи учун жанг қилиб ғалаба қозонишни ўйламоқдамиз.

- "Кавасаки Фронтале" иккинчи йилдирки ҳамма мусобақаларда муваффақиятли иштирок этиб келмоқда.  Ўз чемпионатида етакчилик қилмоқда. Бу ютуқларни ОЧЛда ҳам давом эттирган ҳолда ғолиб чиқишни мақсад қилганмисиз?

- Чиндан ҳам биз яхши ўйин кўрсатмоқдамиз. Ўз ўйин услубимизни шакллантириб улгурдик. Мана шу услуб орқали барча ўйинларда ижобий натижага эришганларимизни қитъа миқёсидаги мусобақада ҳам давом эттиришга ҳаракат қиламиз. 

- Рақиб бош мураббийи "Кавасаки Фронтале"ни қитъанинг энг кучли жамоаси, дея эътироф этди. Бунга муносабатингиз қандай?

- Бизга юқори баҳо бергани учун рақиб жамоа мураббийига раҳмат айтиб қоламан. Лекин бироз ошириб юборибдилар (кулади). Ҳаммаси майдонда билинади. Ўзимизни яхши таассурот қолдиришга уринамиз.