«Обод» БААда «Бейжинг Гоан» билан дуранг ўйнади

Мураббийлар штаби йиғин доирасида асосий эътиборини футболчиларнинг функционал ва жисмоний тайёргарлигини янада ошириш ҳамда таркибга янги жалб этилганларнинг жамоа ўйин услубига мослашиб кетишини таъминлашга қаратишган. Шу мақсадда амирликлардаги йиғин доирасида бир қатор назорат-синов учрашувлари ташкил этиш ҳам кўзда тутилган.

Куни кеча Шавкат Абдухўжаев бош мураббийлигидаги «Обод» жамоаси аъзолари ўзлари каби БААда йиғин ташкил этган Хитойнинг машҳур «Бейжинг Гоан» клубига қарши ўртоқлик учрашувида майдонга тушди. Яхши биласиз, пекинликлар сафида миллий терма жамоамиз аъзоси Егор Кримец тўп суради. Кескин ва муросасиз курашларга бой кечган баҳсда кучлар тенг келди – 1:1. «Обод» ҳисобига ёзилган тўпни эса рақиб футболчиси ўз дарвозасига киритиб қўйди. Учрашувда пойтахт жамоаси қуйидаги таркибда ҳаракат қилишди:

«Обод» – «Бейжинг Гоан» – 1:1
«Обод»: Дилшод Ҳамроев, Хуршид Ғиёсов, Жавлон Искандаров, Илхом Комилов, Шерзод Жалилов, Жавоҳир Қаҳрамонов, Шохруз Норхонов, Санжар Тўрақулов, Ғайрат Умиров, Алишер Азизов, Владислав Нуриев.

«Обод» жамоасининг амирликлардаги йиғини 28 февралда якунланади. Шундан сўнг жамоа аъзолари Тошкентга қайтиб келишади ва Ўзбекистон ХХV миллий чемпионатининг 1-тури доирасида «Қўқон-1912»га қарши кечадиган ўйинга тайёргарликни бошлайди.

«Обод» ФК матбуот хизмати