Нурилло Тўхтасинов: "Барқарор натижа ва чиройли ўйинни танаффусдан кейин ҳам давом эттиришни истаймиз"

Сўнгги учрашувларда ижобий натижалар қайд этаётган "қалдирғочлар" ушбу учрашувга пухта тайёргарлик кўрмоқда. Айни пайтда турнир жадвалида жамоаларнинг очколари ўртасида катта фарқ йўқлигини ҳисобга олсак, "Бунёдкор"да кучли учликка кириш имконияти мавжуд. Биз мазкур баҳс олдидан жамоанинг етакчиси Нурилло Тўхтасиновнинг фикрлари билан қизиқдик. 

"Қўқон-1912" билан ўйинга жуда яхши тайёргарлик кўрмоқдамиз. Сўнгги турларда ғалаба қозониб қайсидир маънода ўзимизга бўлган ишончни орттириб олдик. Худо хоҳласа танаффусдан кейин ҳам чиройли ўйин ва барқарор натижаларни давом эттиришни истаймиз. Учрашувларни ғалаба билан бошлаш ниятидамиз. 

Бу йил кам гол уряпман? Олдинда ўйинлар бор. Муҳими жамоамга фойдам тегса бўлгани. Голни ким уриши муҳим эмас. Уч очкони қўлга киритсак, бас. Рақибимиз сафардаги беллашувларда яхши тўп тепмоқда. Шунга қарамасдан мухлисларимизни хурсанд қилиш учун майдонга чиқамиз. Бизни фақат ютуқ қониқтиради",- дейди Нурилло Тўхтасинов.