"Нурафшон" U-16 чемпионатида қатнашадими? Бухоро вилояти Туризм ва спорт бош бошқармасидан расмий муносабат

Мақолага кўра, Бухоронинг "Нурафшон" клуби бугун ЎзПФЛга хат юбориб, U-16 жамоаси мазкур мусобақада иштирок этмаслигини билдирган. Championat.asia'га маълум бўлишича, бухороликлар бунга мавжуд молиявий муаммоларни рўкач қилиб кўрсатмоқда. Лекин, бу қарор Бухоро вилояти бош жамоасининг тақдирига жиддий таъсир қилиши мумкинлиги ва "Нурафшон" айни пайтда Суперлига плей-офф босқичига йўлланма олиш учун "Олимпик" билан курашаётгани, шу билан бирга бухороликлар бу йўлда муваффақият қозонса ҳам, U-16 жамоаси республика биринчилигида қатнашмаган тақдирда Ўзбекистон чемпионатининг юқори дивизионида иштирок этиш ҳуқуқидан маҳрум бўлиши мумкинлиги айтиб ўтилган эди.

Бироқ биз вазиятни ўрганиш мақсадида Бухоро Футбол клуби спорт директори Умиджон Хотамовга мурожаат қилганимизда Умиджон бизга маблағ масаласи бўйича умуман муаммо бўлмаганлигини, жамоа ҳар доим мусобақаларда иштирок этиб келганлигини ва жорий йилнинг 11-21 ноябрь кунлари Тошкент шаҳрида U-16 жамоалари ўртасида бўлиб ўтадиган Ўзбекистон чемпионати мусобақаларига самарали иштирок этиш мақсадида "Бухоро" футбол клубига қарашли 3-сон Болалар-ўсмирлар футбол мактаби майдонида сафар олди ўқув-йиғин машғулотлари айни дамда қизғин кечаётганини ҳамда "Бухоро" футбол клубининг U-16 жамоаси мусобақаларга иштирок этиш учун 10 ноябрь куни хизмат сафарига йўлга чиқаётганлигини ва мазкур мусобақада ҳам албатта мувафақиятли қатнашишини маълум қилди.

Бухоро вилояти Туризм ва спорт бош бошқармаси
Матбуот хизмати