Нодир Мавлонов: “Спорт формамни тиклаш учун ҳам Бангладеш клубини танладим”

Футболчи чемпионатнинг янги иштирокчиси – “Свадҳината Крира Сангҳа” клуби билан келишувга эришди. Хўш, янги жамоасига қай тариқа йўл олгани ва бошқа мақсадлар борасида Мавлонов фикрларига қулоқ тутдик.

“Бангладешга келганимга икки кун бўлди. Бу ерга йўл олишим агентим орқали амалга ошди. Аслида Бангладеш чемпионатига келиш ниятим йўқ эди. Йил бошид мен бошқа жамоа билан келишувга эришгандим. Бироқ мамлакатда юзага келган карантин қоидалари туфайли деярли бир йил футбол ўйнамадим. Шунинг учун ҳам Бангладеш Премьер-лигасининг янги иштирокчиси билан олти ойлик шартномага имзо чекдим. 

Шартномам муддатини олти ойга тузганимга асосий сабаб, спорт формамни тиклаб олиш асосий вазифа ҳисобланади. Юқорида айтганимдек, бир йилга яқин вақт давомида ўйнамадим. Бу эса албатта катта йўқотиш ҳисобланади. Клуб менга бир йиллик битим таклиф қилди. Бироқ мен олти ойлик шартномани танладим. 

Бу ерга келишдан аввалроқ Отабек Валижонов билан ўзаро маслаҳатлашдим. У киши қаерда бўлмаса ҳам, спорт формамни тиклашим лозимлигини маслаҳат берди. 

“Свадҳината Крира Сангҳа” клуби янги мавсумда ўз олдига юқори мақсадларги қўяётгани рост. Чунки улар мени ва бошқа легионерларни жуда яхши кутиб олди ва барча шароитларни яратиб бермоқда. Мендан ташқари, жамоада эронлик, босниялик, польшалик легионерлар ҳам бор. 

Бруней мамлакати клуби билан деярли келишувга эришгандик. Шартнома имзолаш арафасида эдим. Аммо Брунейда карантин эълон қилинди ва футбол мусобақалар бекор бўлди. Шу сабабли мен ҳам уйга қайтишга мажбур бўлгандим", - деди Мавлонов.