"Навбаҳор" - "Пахтакор" ўйинида Асқаровнинг четлатилиши тўғри қарор эдими? Суперлиганинг 24-туридаги ҳакамлик фаолияти таҳлили

Championat.Asia сайтининг ҳакамлик фаолияти бўйича эксперти, россиялик собиқ ҳаками Анатолий Синяев ("Алё, рэф!" Телеграм канали муаллифи) Суперлиганинг 24-тури ўйинларидаги баҳсли эпизодларни таҳлил қилди.

✅ "Динамо" - "Локомотив"

ВИДЕОЛАВҲАНИ ТОМОША ҚИЛИШ

Бу вазиятни қўполлик чегараси дейишимиз мумкин, лекин шу билан бирга сариқ карточкага бироз яқинроқ хатти-ҳаракат амалга оширилган. "Динамо" ўйинчисининг юқори тезликда рақибининг оёқларига орқадан сакраши майдондан четлатиш учун асос бўлиши мумкин. Бироқ бутса таг қисмининг тўғридан-тўғри рақиб оёғига тегмагани ва оёқни чалиш ҳолати ён томондан содир бўлганини ҳисобга олсак, ҳакамнинг сариқ карточка кўрсатиш қарори ва VARнинг аралашмаганини қўллаб-қувватлаш мумкин. Агар ҳакам "Динамо" ўйинчисини майдондан четлатишга қарор қилган тақдирда ҳам, унинг бу қарорини қўллаб-қувватлаш мумкин бўларди.

❓ "Динамо" - "Локомотив"

ВИДЕОЛАВҲАНИ ТОМОША ҚИЛИШ

Ўйин шарҳига киритилган такрорий вазиятларда офсайд чизиқлари кўрмаяпман. Агар ҳакамларда "Локомотив" ўйинчисининг офсайдда турганлиги ҳақида далил бўлса, голни бекор қилиш тўғрисидаги қарорни қўллаб-қувватлаш мумкин. Акс ҳолда, голни ҳисобга олиш керак эди. Шу билан бирга, VARдаги ҳакамлар бош ҳакамни мониторга чақирмасдан, офсайд бор ёки йўқлигини ўзлари мустақил равишда ҳал қилишлари лозим эди.

✅ "Навбаҳор" - "Пахтакор"

ВИДЕОЛАВҲАНИ ТОМОША ҚИЛИШ

VAR вазиятга тўғри аралашди. "Пахтакор" жамоаси ўйинчиси тўпга ўйнашга уриниб, оёғини ҳаддан ташқари юқори кўтарди ва рақиб оёғининг тўпиғига тегиб кетди. Бундай қўпол ўйин жиддий жароҳат етказиш хавфини туғдиради. Қоидани бузган футболчи тўқнашувни юмшатишга ёки ундан бутунлай қочишга ҳаракат қилмади (оёғини йиғиб олмади). Қизил карточка тўғри кўрсатилди.

✅ "Насаф" - "Сўғдиёна"

ВИДЕОЛАВҲАНИ ТОМОША ҚИЛИШ

"Насаф" ўйинчиси тўпни қўлиб билан ўйнаб, қоидабузарлик содир этган. Қўл чўзилган ҳолда тана майдонини кенгайтирган. Шундан сўнг бир неча узатмадан сўнг гол урилди. Ҳакамнинг қарори тўғри ва VAR тизимининг аралашуви ўринли бўлди.

❌ "Насаф" - "Сўғдиёна"

ВИДЕОЛАВҲАНИ ТОМОША ҚИЛИШ

Бу вазиятда энг мақбул ечим - ҳар иккала ўйинчига ҳам сариқ карточка кўрсатиш. "Насаф" жамоаси ўйинчиси (7-рақам) рақибига нисбатан қўпол ўйин намойиш этган бўлса, "Сўғдиёна" жамоаси ўйинчиси (8-рақам) эса жанжал келтириб чиқариб, спортга хос бўлмаган хатти-ҳаракат намойиш этди. Ҳакам ва ассистентнинг ўз вақтида тўғри муносабат билдирганини таъкидлаб ўтмоқчиман. Улар тезда можарога аралашиб, вазиятнинг янада кескинлашишига йўл қўймади.

P.S. Ҳакам фақатгина Акмал Мозговойни огоҳлантирди.

✅ "Сурхон" - "Нефтчи"

ВИДЕОЛАВҲАНИ ТОМОША ҚИЛИШ

Қизиқ ҳолат юз берган. Ҳакам дастлаб тўғри қарор қабул қилган ҳолда, фол жарима майдони чизиғидан ташқарида бўлганини таъкидлаб, "Нефтчи" фойдасига жарима зарбаси белгилади. Кейин ёрдамчи ҳакамнинг нотўғри маслаҳати оқибатида қўполлик жарима майдони ичида содир бўлганини маълум қилди ва "Нефтчи" пенальти тепишга тайёргарлик кўра бошлади. Шундан сўнг VAR тизими вазиятга тўғри аралашиб, бош ҳакамнинг дастлабки қарорини тасдиқлади. Қоидабузарлик ҳақиқатан ҳам жарима майдони ташқарисида содир бўлганди.

Шу тариқа, Суперлиганинг 24-турида ҳакамлар битта хатога йўл қўйишди: "Насаф" - "Сўғдиёна" ўйинидаги тўқнашувда ҳакам фақат битта ўйинчига сариқ карточка кўрсатган. Шунингдек, экспертимизда "Динамо" - "Локомотив" учрашувида бекор қилинган гол ҳақида ҳам саволлар туғилмоқда.