Музаффар Абдуллаев: "Олдимизга қўйилган вазифа яна ҳам қийинлашди"

Ушбу турда Жиззахнинг "Сўғдиёна" клуби ўз уйида Тошкентнинг "Пахтакор" жамоасини қабул қилади. Учрашувдан олдин "Сўғдиёна" клуби посбони Музаффар Абдуллаев ўз фикларини билдириб ўтди.

"Биз ҳар бир учрашувга жиддий тайёргарлик кўрамиз. Бошқа жамоаларга қай даражада тайёргарлик кўрсак "Пахтакор"га қарши баҳс учун ҳам худди шундай тайёргарлик кўрдик. Бундан аввалги турда "Шўртан" жамоасига қарши баҳс олиб бордик ва мағлубиятга учрадик. Ушбу ўйиндан сўнг, ЎФФ томонидан янги қарор ҳақида эълон қилди. Ушбу хабардан сўнг жамоадошларим билан "шок" ҳолатига тушиб қолдим. Ҳозир биз олий лигада қолиш учун кураш олиб боряпмиз. Энди олдимизга қўйилган вазифа яна ҳам қийинлашди. Айни дамда олий лигада қолиш учун бизда имконият бор. Олдинда турган 4та учрашувда ўзимизга керак бўлган очколарни қўлга киритишимиз шарт. 

Ҳозир барча эътиборни "Сўғдиёна" жамоасига қаратганман. Ушбу жамоани олий лигада олиб қолиш учун қўлимдан келганча ҳаракат қиламан. Келаси йили қайси жамоа шарафини ҳимоя қилишимни вақт кўрсатади. Ҳозирча бу ҳақида ўйлаб кўрганим йўқ. Бугунги рақибимиз "Пахтакор" жамоасига келадиган бўлсам, "шерлар" кучли жамоа. Ҳар бир чизиғида яхши футболчилар тўп тепади. Хавфли футболчилари Марко Симич ва Тиаго Безерра. Футболда мухлислар ўн иккинчи ўйинчи ҳисобланади. Насиб қилса мухлисларимиз кўз ўнгида "Пахтакор"ни мағлуб этамиз ва ғалабани мухлисларимизга тақдим этамиз", - дейди "Сўғдиёна" дарвозабони Музаффар Абдуллаев

Жаҳонгир Сотволдиев суҳбатлашди