Моуринью ва Анчелотти ўртасидаги 8-тўқнашувни ўтказиб юборманг!
10 фев 2021 13:22
Янгиликлар

Моуринью ва Анчелотти ўртасидаги 8-тўқнашувни ўтказиб юборманг!

Бугун Лондоннинг "Тоттенхэм" клуби Англия кубоги 1/8 финали доирасида "Эвертон" меҳмони бўлади.

Мерсисайддаги учрашув Тошкент вақти билан 01:15 да старт олади. Мазкур баҳсда асосий интрига иккала мураббий — Жозе Моуринью ва Карло Анчелотти ўртасида рўй бериши кутилмоқда. Ўз вақтида жаҳонда кучлилар рейтингини бошқарган мутахассислар фаолиятида "чўкиш" рўй беряпти гўё. Бундан 5-6 йил муқаддам Моуринью, Анчелотти сингари мураббийлар "Тоттенхэм"-у "Эвертон"лар юборган хатни почта қутисидан олиш учун эгилиб ҳам ўтирмасди...

Маълумот учун, бугунги баҳс иккала мураббий ўртасидаги 8-расмий ўйин ҳисобланади. Португалиялик "беназир" Италиянинг "Карло отаси" билан илк бор 2003 йилнинг август ойида "учрашган" эди. "Порту" ва "Милан" ўртасидаги УЕФА суперкубоги учун баҳс "россонерилар"нинг кичик ҳисобдаги ғалабаси билан якунланган, ўйин тақдирини ҳал қилган ягона гол Андрей Шевченконинг номига ёзилган эди.

Кейинчалик "икки наҳанг" Милан дербиси, Европа Чемпионлар Лигаси ва Англия чемпионатида куч синашиб кўришди.

сана	мусобақа	мавсум	тур	уй	ҳисоб	меҳмон
13.09.2020	АПЛ	20/21	1	Тоттенхэм	0:1	Эвертон
06.07.2020	АПЛ	19/20	33	Тоттенхэм	1:0	Эвертон
16.03.2010	ЕЧЛ	09/10	1/16 финал	Челси	0:1	Интер
24.02.2010	ЕЧЛ	09/10	1/16 финал	Интер	2:1	Челси
15.02.2009	А Серия	08/09	24	Интер	2:1	Милан
28.09.2008	А Серия	08/09	5	Милан	1:0	Интер

Гувоҳи бўлганингиздек, ўзаро баҳсларда 3 бор Анчелотти бошчилигидаги жамоаларнинг қўли баланд келган бўлса, 4 ўйин якунида Моуринью шогирдлари ғалабани тантана қилган. Қизиқарли жиҳати шундаки, иккала мураббий ўртасидаги баҳсларда ҳеч қачон дуранг натижа қайд этилмаган ва барча учрашувларда ғолиб 1 тўп фарқи билан зафар қучган. Демак, бугунги баҳсдан шиддатли ўйин кутишимиз учун асослар етарлича. Бугун ҳам футболдан завқ олишни истасангиз, еврофутболнинг забардаст мураббийлари орасидан ажралиб, мўйсафид мутахассислар сафига қўшилишга улгурган "беназир" ва "Карло ота" ўртасидаги "жанг"ни ўтказиб юборманг!