Мўминхон Баходирхонов: "Агар Ирландия ўз кучи билан ютган бўлса, ҳали улар билан кўришамиз"

— Биз ўз ўйин услубимиз билан ғалабага ҳаракат қилиб ўйнаган эдик. Афсуски, ҳимояда хатоларга йўл қўйдик. Рақибни эса иккинчи қаватда яхши ўйнашини билардик. Ҳимоячилар бир-бирларига ўйинчи яқинлашиб келаётганини айтишмади. Шу сабаб тўп ўтказиб юбордик деб ўйлайман. Ҳали 17 ёшмиз, ушбу ўйинлар бизга тажриба беради. Агар Ирландия ўз кучи билан ютган бўлса, ҳали улар билан кўришамиз.

— Жамоага яна нималар етишмади деб ўйлайсиз?

— Жамоа бор кучи билан ҳаракат қилди. Умуман олганда, ҳимояда ҳам, ҳужум чизиғида ҳам яхши ҳаракат қилдик деб ўйлайман. Қўлимиздан келган барчасини қилдик. Биз ҳаракат қиляпмиз, аммо ўйиндаги паузалар бизни синдириб қўйди деб ўйлайман.

— Ўйинда Мусахоновнинг ўрнини кўп ёпишга мажбур бўлдингиз. Ўзи бунга нима сабаб бўлди? Мусахоновнинг олдинга чиқишини мураббий сўраган эдими?

— Албатта, рақиб ўйинчиларини, айниқса 9 ва 11-рақамли ўйинчиларини билардик. Ўйинда бир-биримизни ёпиб ўйнашга ҳаракат қилдик. Аммо, Мусахонов бугун рақибга ҳеч қандай имконият бермади деб ўйлайман.

— Биринчи голни уриб олганимиздан сўнг ўзимиз ўйинни бўшаштириб юбордикми ёки Ирландия кучи эвазига устунликни қўлга олдими?

— Бизнинг ёшимизда, гол урилса, иккинчи жамоа кучайиб кетади. Ҳали ёшмиз. Голдан сўнг яна гол уришга ҳаракат қилдик, шу сабаб оддий вазиятларда тўпни рақибга бериб қўйдик. Иккинчи тайм ўрталаридан бизнинг хатоимиз эвазига рақиб кўпроқ тўпга эгалик қилди деб ўйлайман.

— Иккинчи қаватда яхши ўйнаш кераклиги ўргатилганмиди?

— Албатта. Мураббийларимиз ҳар бир ўйин олдидан рақибни ўрганиб, кўрсатмалар беришади.