Миллий терма жамоа Тошкентда машғулотларга киришди

Ўзбекистон миллий терма жамоаси 10 ноябрь, якшанба куни Тошкентдаги «ЖАР» стадионида ўзининг навбатдаги йиғинини бошлади. Таъкидлаш жоиз, миллий терма жамоа бош мураббийи Миржалол Қосимов мазкур йиғинга жами 24 нафар футболчини жалб этган.

Маълумот ўрнида, Санжар Турсунов («Газовик») ва Баҳодир Насимов («Нефтчи») Тошкентдаги йиғинга 11 ноябрь куни келиб қўшилишса, Одил Аҳмедов 12 ноябрь куни эрталаб миллий терма сафига келиб қўшилади. Жанубий Кореянинг «Сеонгнам» клуби шарафини ҳимоя қилаётган миллий терма жамоа сардори Сервер Жепаров терма жамоа сафига Вьетнамда қўшилади. Миллий терма жамоа делегацияси эса 12 ноябрь, сешанба куни кечаси Вьетнамга учиб кетади.

Эслатиб ўтамиз, Ўзбекистон миллий терма жамоаси 15 ноябрь куни Ханоида Вьетнамга қарши, 19 ноябрь куни эса сафарда Гонконгга қарши ОК-2015 саралаши учрашувларида майдонга тушади. Қосимов шогирдлари айни дамда саралашнинг «Е» гуруҳида 4 очко билан 2 ўринда бораётган бўлса, уч ўйинда учта ғалабага эришган БАА терма жамоаси гуруҳда пешқадамлик қилмоқда.