“Металлург”: Назорат учрашувида “Бунёдкор” мағлубиятга учратилди

“Бунёдкор” футбол академияси майдонида бўлиб ўтган мазкур учрашувда бекободликлар 3:1 ҳисобида ғалаба қозонишди.

Учрашувнинг дастлабки дақиқалариданоқ ташаббусни ўз қўлига олган “Металлург” футболчилари биринчи таймнинг ўзида мезбонлар дарвозасига иккита гол киритишга муваффақ бўлишди. Даставвал, ўнг қанотда ўйин қоидаси бузилгач, жарима зарбасини Дилмурод Каримов амалга оширди. У тўпни дарвозанинг олис бурчаги яқинига етказиб берди ва ҳимоячилар таъқибисиз қолган Дониёр Одилов ҳисобни очди. Тайм тугашига яқинроқ эса Давронбек Каримқуловнинг чап қанотдан уюштирган дриблинги “Бунёдкор” ҳимоячилари учун кутилмаган ҳол бўлди. Икки ўйинчи орасидан бемалол ўтиб кетган Каримқулов Муроджон Зуҳуров билан яккама якка чиқди ва ҳисобни 2:0 ҳа етказди. Мезбонлар таркибидаги Шаҳзодбек Нурматов, Минори Сато, Баҳодир Насимовларнинг вазиятни ўнглашга бўлган уринишлари эса самара бермади.

Иккинчи таймда ҳар иккала жамоа мураббийлари таркибларни деярли тўлиқ алмаштиришди. Ўз навбатида мухлислар бу таймда ҳам дарвозаларга иккита тўп киритилишига шоҳид бўлишди. Аввалига мезбонлар ҳисобдаги фарқни қисқартиришган бўлишса, тайм ўрталарида Намозов – Абдуллаев – Шотурсунов комбинацияси Фаррухнинг бўш қолдирилган дарвозага гол киритиши билан якунланди – 3:1.

 

“Бунёдкор” – “Металлург” – 1:3 (0:2). 11.11.2016 йил. “Бунёдкор” академияси майдони.

Голлар: 0:1 – Дониёр Одилов (18), 0:2 – Давронбек Каримқулов (37), 1:3 – Фаррух Шотурсунов (75).

“Металлург”: Зафар Сафоев (Суҳробжон Султонов), Давронбек Каримқулов (Шерзод Жалилов), Ҳикмат Ҳошимов, Дониёр Одилов, Мирғиёс Сулаймонов, Жаҳонгир Абдумўминов (Фарҳод Намозов), Муроджон Тошматов (Эргаш Исмоилов), Жавоҳир Эсонқулов (Муҳаммадодил Қаҳрамонов), Аюбхон Нўъмонов (Улуғбек Худойбердиев), Дилмурод Каримов (Фаррух Шотурсунов), Зоҳид Абдуллаев (Жасур Аҳмедов).