"Мен ҳам ёзишни хоҳлайман" рукнига. "Нефтчи" ҳақида ўй ва мулоҳазалар

Қуйида ана шундай мақолалардан бирини эътиборингизга ҳавола этамиз. Агар сизда ҳам ёзиш истаги бўлса, э-майл орқали [email protected] манзилига юборишингиз мумкин. Шунингдек, биз билан Телеграм орқали ҳам боғланиш имкони бор - https://t.me/CA_admin

"Нефтчи" ҳақида ўй ва мулоҳазалар

Ассалому алайкум, Championat.asia сайти ходимлари, авваломбор сизларга ўз миннатдорчилигимни билдирмоқчиман. Биз мухлисларга шундай имконият яратиб берганингиз учун. Умид қиламанки, сизлар билан узоқ йиллар ҳамкорлик қиламиз.

Мен Фарғона вилоятиданман. Албатта, Фарғонада “Қўқон-1912” ва “Нефтчи” жамоалари бор. Мен “Нефтчи” мухлисиман. Чунки ёш болалик пайтимиз “Нефтчи”нинг ўйинларини кўриб футболга меҳр қўйганмиз. Ўйин бўладиган кунларни сабрсизлик билан кутардик. Ўша пайтлари анча-мунча жамоага Фарғонадан очко олиб қайтиш насиб қилмас эди.

Ҳа, ўша буюк инсон Юрий Вазгенович Саркисян майдоннинг ҳар бир қарич ери учун жон бериб курашиш кераклигини футболчиларга руҳан сингдириб майдонга туширарди. Нафақат руҳан, жисмонан, техник, тактик - барча йўналишлар бўйича мукаммал даражада профессионалларга хос тарзда иш юритарди. Жамоа Саркисян билан ўша пайтда ўзбек футболининг пешқадамига айланган эди. 5 маротаба Ўзбекистон чемпиони, бир неча бор кумуш, бронза, мамлакат Кубоги, Суперкубоги, Осиё чемпионлар лигаси, МДҲ кубогидаги муваффақиятли ўйинларни, ОФК кубогидаги ўша унутилмас ўйинларни ҳали ҳануз биз мухлислар унутганимиз йўқ.

Юрий Саркисян жамоага шу даражада содиқ эдики, ҳатто араб клубларидан тушган катта маблағли шартномалар таклифини қабул қилмай, фақат “Нефтчи” учун бутун фаолиятини бағишлади. Вақт кўп нарсани ўзгартирди. Пойтахт жамоалари кучая бошлади. Натижада “Нефтчи” пешқадамликни “Пахтакор”га бериб қўйди. Лекин тан олиш керак, “Пахтакор”га кўп ўйинларда хакамлар ёрдам берарди. 

Натижада ҳамиша ғолиб бўлиб, чемпион бўлиб юрган жамоа мухлисларини бу натижа қониқтирмади. Мухлислар Саркисяннинг вақти ўтгани, унинг тактикаси эскиргани, “Нефтчи”га янги мураббий кераклиги ҳақида очиқ гапира бошлашди. Мен ўзим ҳам кўплаб мағлубиятлардан кейин шундай фикрда эдим. Лекин Саркисян қилган меҳнатларни муносиб тарзда тақдирлаб, барчаси учун унга раҳмат айтиб, чиройли тарзда истеъфога кузатиб қўйиш керак эди. Аксига олиб, ундай бўлмади. У жамоани ранжиган ҳолда тарк этди.

Мана, Саркисяннинг жамоадан кетганига неча йиллар бўлди. Лекин “Нефтчи” жамоа ўзига кела олгани йўқ. Гоҳида мухлислар “Саркисян жамоадан хафа бўлиб кетган, шу сабаб жамоа мағлубият кўчасидан чиқиб кета олмаяпти” дейишади. Менимча, бу ҳам тўғри фикр. Саркисян бутун умрини шу жамоа учун бағишлаган эди. 

Саркисяндан кейин клуб раҳбарияти, мураббийларида кўплаб ўзгаришлар бўлди. Аввалига Амет Мемет жамоа мураббийлигига келди. Кейин Андрей Фёдоров, жамоанинг собиқ футболчиси, сўнгра Мурод Исмоилов келса ҳам натижа ўзгаришсиз қолди. Тўғри, Фёдоров мураббийлигида жамоа бир мавсумда кучли учликка курашди. Анча мазмунли ўйин кўрсатди. Лекин кейин яна пастга қулашда давом этди.

Шундан сўнг кутилмаганда жамоага ҳозирги кундаги бош мураббий Вадим Абрамов таклиф этилди. Бу хабар ҳаммани қувонтирди. Шахсан мен ҳам бу хабарни эшитиб жуда хурсанд бўлдим. Сабаби, Вадим Абрамовнинг кучли мутахассис эканлиги барчага яхши маълум. Абрамов Қатардаги Осиё чемпионатида Ўзбекистон миллий терма жамоаси билан нималар қилганини барчамиз яхши биламиз. Ўша чемпионатда Ўзбекистон МТЖ ҳар томонлама техник, тактик, жисмонан, руҳан пухта тайёргарлиги ва чиройли ўйини билан барча мухлисларни ўзига ром қилган эди.

Очиғи, Ўзбекистон МТЖнинг бу даражадаги ўйинини қайтиб кўрмадим. Абрамов ўша мусобақа орқали Ўзбекистондаги энг кучли мураббий эканлигини исботлади ва буни барча кўрди. Вадим Карленович “Нефтчи”ни жуда қийин вазиятда қабул қилиб олди. Жамоа турнир жадвалининг сўнгги ўринларида бораётган эди. Абрамов жамоага келганида ички муҳит ачинарли аҳволда эканини айтиб ўтди. Мураббий жамоага келиб, ҳолатни ўз кўзи билан кўриб, ички муҳитни жуда яхши ҳис қилди. Менимча, Абрамов ҳам кутилган натижани ололмаяпти.

Гоҳида омад очиқчасига юз ўгирмоқда. Абрамовнинг жамоага қай даражада жон куйдираётганини ўз кўзимиз билан кўряпмиз. Тўғри-да, жамоада ички муҳит умуман издан чиқиб кетганди. Мен жамоа билан бирга эмасман, лекин "Нефтчи"нинг майдондаги кўрсатаётган ўйинидан шундай хулосага келиш мумкин. Агар ҳаммаси яхши бўлса, ҳамма ўз ишини билиб қилса, жамоа бундай қийин вазиятга тушиб қолмасди. Абрамов тинимсиз ишламоқда, жамоа эса ўзига кела олмаяпти. 

Ниҳоят, "Нефтчи" ғалаба қозонди. Сафарда “Олмалиқ” мағлуб этилди. Очиғи, мен Абрамов учун жуда хурсандман. Чунки бу инсон қўли остида жамоа бу даражада инқироз кўчасига кирмаслиги керак. Ўйлайманки, бу ёғига фарғоналиклар ўзларига келиб олишади ва олий лигада қолишни уддалайдилар. Янги мавсумда агар клуб раҳбарияти Абрамовга барча шароитни яратиб берса, мураббий ўзи ҳохлаган футболчиларни жамоага таклиф этса, ўйлайманки “Нефтчи”нинг мухлислари соғинган катта ғалабалар ҳали олдинда. Абрамовга вақт ва имконият бериш керак. Шу ўринда Вадим Абрамов ва “Нефтчи”га омад тилайман.

Илҳом Мирзаев, Фарғона вилояти, Марғилон шаҳри.