Мбаппе Мадридга ташриф буюрди

Футболчи Испания пойтахтида жамоадоши Ашраф Ҳакими билан бирга машҳур ресторанда овқатланди.

Олдинроқ испан клуби 23 ёшли франциялик футболчига 40 миллион евро маошни (солиқлардан ташқари) ўз ичига олган шартнома таклиф қилаётгани маълум бўлганди. Шунингдек, футболчи шартнома имзолагани учун 180 миллион евро бонус олиши мумкин.

Мбаппе жорий мавсумда ПСЖ сафида 43 ўйинда 35 та гол урди ва 23 та голли узатмани амалга оширди. Ҳужумчининг парижликлар билан шартномаси 2022 йилнинг 30 июнига қадар амал қилади.