Майдон ичида қолиб кетаётган U-20 Осиё кубоги ёхуд Тошкентда сезилмаётган мусобақа шукуҳи

ОФК кетма-кет иккинчи йил икки ёш тоифасидаги қитъа мусобақасини ўтказишни ЎФАга ишониб топширди. Ташкилот турнирни кўнгилдагидек ўтказишга барча имкониятни ишга солмоқда. Аммо, лекин, бироқ дейдиган жиҳатлар ҳам йўқ эмас. 

U-20 Осиё кубоги борлигини биз биламиз лекин кўчадаги аҳоличи?

Ҳақли савол. Бу терма жамоадаги 3-4 нафардан бошқа футболчилар ҳали нотаниш. Ўз клубларида асосан ўринбосарлар жамоаларида тўп тепиб келаётган йигитлар. Шундай экан ишқибозларда етарлича маълумот йўқ. Бу мусобақа орқали ёш футболчиларда ўзларини танитиб олишлари имкони бор. Лекин кўчадаги оддий одам эртага турнир бошланишини биладими? Йўқ. Чунки Тошкентда ҳеч қандай мусобақа шукуҳи сезилмаяпти. Фарғонада эса билмаймиз. Афишалар, рекламалар, қисқаси тарғибот етарли даражада эмас. Стадион атрофида қандайдир белгилар кўзга ташланмаяпти. Футбол бу байрам, кўнгил ёзиш, ҳордиқ чиқариш деганидир. Гап йўқ, ташкилотчилик юзасидан тегишли ходимлар ҳаракат қиляпти.  Аммо U-20 мусобақаси фақат майдон ичида қолиб кетаётгандек кўриняпти. Тошкентда шундай катта турнир бўлаётганини футболга қизиқмайдиган одам ҳам бир қарашдаёқ пайқаши лозим. 

Чипталар мавзуси 

Ўтган йилги U-23 мусобақасида мухлисларнинг стадионга ташрифи финалгача бепул этиб белгиланганди. Ўша пайтда финал ўйинига чиқарилган чипталар бир кечадаёқ "туя" қилиб кетилгани ёдингизда бўлса керак. Эндиликда бу йил чипта билан боғлиқ барча масалалар iTicket.uz орқали бўляпти. Сотув ҳам шу платформада амалга оширилмоқда. Энг қизиғи мазкур масалада ЎФАдан айтарли аниқ жавоб ололмадик. 

Лекин нега бу йил пуллик қилиб қўйилди, деган саволга 2та тахминий жавобимиз бор. Биринчиси аввалги мусобақада Ироқ билан баҳсдаги "ишкал"дан сўнг АФКнинг талаби, иккинчиси ЎФАга қўшимча даромад келиб тушиши. Чипталарга келсак, нархлари у даражада қиммат эмас. 10 000 сўмдан 50 000 сўмгача. Яна бир маълумот Фарғонада "Истиқлол" стадионидаги ўйинларга ораси яқин баҳсларга битта чипта сотиб олиб 2та учрашувга тушишингиз мумкин. 

Нима бўлганда ҳам терма жамоа аъзоларига фақат омад тилаймиз.