Любинко Друлович Тожикистон билан ўйиндан кейин: "Жамоам фантастик ўйнади"

"Бугун жуда яхши ўйнадик деб ўйлайман. Яъни 90-95 дақиқа давомида биз ўйинни тўлиқ назорат қилдик. Агар бугун бир жамоа ғалаба қозониши керак бўлса ўша жамоа биз эдик. Учрашувда 2-3та вазиятлар бўлди, аммо ундан фойдалана олмадик. Муҳим ўйинда яхши ўйнаб, кейинги босқичга чиқдик. Бугунги учрашув учун футболчилардан миннатдорман", - дейди Любинко Друлович.

- Жамоа декабрь ойидан буён ушбу саралаш баҳсларига тайёргарлик кўрди. Аммо икки ўйинда ҳам ёрқин ўйин кўрмадик.
- Мен келганимга икки ой бўлди. Балки Ҳиндистон ва Тожикистон билан ўйинлар ўхшамагандир. Аммо биринчи ўйинда 3та гол урдик. Бугун ҳам ҳисоб очилмаган бўлса ҳам жамоам фантастик ўйнади деб айта оламан. Чунки натижа жуда ҳам муҳим эди. Бу жамоанинг ўйинидан тўла қониқдим.

- Осиё чемпионатига қадар таркибда ўзгаришлар бўладими ёки мана шу йигитлар асос бўлиб хизмат қиладими?
- Қитъа чемпионатигача ҳали вақт бор. Биз яна ҳам яхши ўйнаб Осиё чемпионатида муносиб иштирок этишга ҳаракат қиламиз. Асосий мақсадимиз Олимпиада ўйинларига чиқиш. Сизларга ёқадиган ўйин ва кўплаб голлар уришга ҳаракат қиламиз. Бобир Абдихолиқов жароҳати сабабли саралашда тўлиқ куч билан ўйнай олмади.

- Футболчи ўзининг клубида ўйнаб тажриба тўплагани маъқулми ёки терма жамоа йиғинларида юрганими?
- Ўйинчи клубда қанча кўп ўйнаса бу терма жамоага ҳам фойда бўлади.

- ОТЖ йиғинлари Суперлига ўйинлари пайтида бўладими ёки фақат ФИФА кунларидами?
- Бунгача икки ой давомида терма жамоа бирга бўлди. Энди футболчилар клублари сафида ўйнашлари керак. Йиғинлар фақат ФИФА кунлари пайтида бўлади.

- Биз Олимпиадага чиқмоқчи бўлсак Корея, Япония, Австралия каби жамоаларни мағлуб этишимиз керак бўлади...
- Албатта Европа ва Осиёнинг гранд жамоалари билан ўйнашга ҳаракат қиламиз. Шу орқали кучли жамоаларга тайёргарлик кўрамиз.

- Терма жамоанинг марказий ярим ҳимояси кучсиздек кўринмоқда. Асосан қанотлардан ҳужум қилаяпмиз...
- Бугун ярим ҳимоячиларимиз у қадар ёмон ўйнашмади. Абдуллаев, Рустамов, Ўрунов каби футболчилар бор. Аброр Исмоилов эса жароҳат олгани боис ўйнамади. Тўғри ўйин пайтида тўп йўқотишлар бўлади, аммо учрашув бизнинг устунлигимиз остида ўтди.