Klublar o'rtasidagi jahon chempionati boshlanishiga ikki hafta qolganida yangilangan turnirning so'nggi ishtirokchisi ma'lum bo'ldi. Bu Ugo Loris o'ynayotgan "Los-Anjeles" va o'tish o'yinlarida Meksikaning "Amerika"siga qarshi o'yinda g'alabani tortib olgan Olive Jiru bo'ldi.
Eslatib o'tamiz, Xames Rodriges o'ynayotgan Meksikaning "Leon" klubi taqiqqa uchragani sabab klublar o'rtasidagi JCHdagi so'nggi o'rin bo'sh qolgandi.
MLS klubi 89-daqiqada o'zini-o'zi qutqardi va so'ngra g'alabani ilib ketdi. Endi ular KJCHni "Chelsi"ga qarshi o'yin bilan boshlaydi
"Los-Anjeles" 2023 yilgi KONKAKAF Chempionlar Ligasi finalida ishtirok etgani va unda aynan "Leon" jamoasiga mag'lub bo'lgani sabab o'tish o'yinlariga tushib qoldi. "Amerika" tanlab olindi, chunki bu klub so'nggi to'rt yil ichida KONKAKAF koefficientlari reytingida hali turnirda ishtirok etmaganlar ichida yetakchilik qilmoqda.
Ammo jamoalar turli holatlarga tushib qolishdi: "Los-Anjeles" o'z uyida o'tish o'yinini o'tkazdi (chiptalar klublar o'rtasida teng taqsimlangan bo'lsa ham), "Amerika" esa Meksika chempionatining qiyin pley-off bosqichidan so'ng darhol yetib keldi va jamoa u yerda Klausuraning ikki o'yinlik finaliga chiqdi (mag'lubiyat - 0:0 va 0:2).
"Amerika" baribir klublar o'rtasidagi jahon chempionatiga bir qadam qolgandi. Meksikaliklar 64-daqiqada Brayan Rodrigesning penaltidan urgan goli evaziga hisobda oldinga chiqib olishdi.
Ammo "Los-Anjeles" o'yin oxirida barchasini o'zgartirib yubordi: 89-daqiqada burchakdan uzatilgan to'p Igor Jezusning bosh bilan yo'llagan aniq zarbasi bilan yakunlandi. Shu tariqa o'yin qo'shimcha bo'limlarga ulanib ketdi va amerikaliklar 115-daqiqada kelib raqibga zarba berdi.
G'alaba to'pi "Sent-Eten" sobiq futbolchisi Deni Buanga hisobiga yozildi. Olive Jiru ham hal qiluvchi hujumda ishtirok etdi.
"Bu mavsumdagi eng yaxshi o'yin bo'lsa kerak. Garchi xatolarga yo'l qo'yilgan bo'lsa-da, - dedi o'yindan so'ng "LA" bosh murabbiyi Stiv Cherandolo. - Bu g'alaba klubimizni yangi bosqichga olib chiqadi va butun ligaga yordam beradi, chunki MLS klublar o'rtasidagi JCHda yana bir jamoaga ega bo'ldi".
Aslida, bu kamida 9,55 million dollarlik o'yin bo'ldi. Bu KJCH ishtirokchilariga kafolatlangan kirish bonusi. "Los-Anjeles" D guruhidan o'rin oldi: dastlabki turda "Chelsi" keyin esa Tunisning "Esperans" va Braziliyaning "Flamengo" jamoalari to'qnash kelishadi.
Klub MLSda hozirda G'arbda oltinchi o'rinni egallab turibdi va raqiblaridan 1-2 ta kam o'yin o'tkazgan.
Xames va "Leon"ni nega chetlatishdi?
Turnirda bitta mulkdor yoki yuridik shaxsga tegishli ikkita klub bo'lishi mumkin emas edi. "Leon" taqiqi bo'yicha yakuniy qaror bir oy oldin qabul qilingan: apellyaciya esa rad etilgan.
Grupo Pachuca kompaniyasi "Leon" va "Pachuka"ga egalik qiladi. Meksikalik biznesmen Xose de Xesus Martines Patino "Pachuka"ni 1995 yilda, "Leon"ni esa 2011 yilda, jamoa ikkinchi divizionda bo'lganida sotib olgan. ESPN’ning yozishicha, tijoriy reestrda Patino "Leon"ning 55 foiz va "Pachuka"ning 50 foiz akciyasi egasi sifatida qayd etilgan.
Meksika chempionatida uzoq vaqt ko'z yumildi, ammo 2027 yilga kelib u yerda ham bir nechta klubga egalik qilish mumkin bo'lmay qoladi. Shu sababli, Patino "Leon"ni sotmoqchi bo'lgan va klublar o'rtasidagi JCHda ishtirok etish bilan bog'liq muammolardan qochmoqchi edi. Qur'a tashlashdan oldin u shunday degan edi: "Biz FIFAga Meksika chempionatidagi klublar xo'jayinlari yig'ilishida "Leon"ni sotish rejasi haqida ma'lum qilganimizni aytdik".
Ammo ish bundan nariga o'tmadi: hukumat ma'lumotlariga ko'ra, ulushlar taqsimoti o'zgarmagan, birorta klubda yangi xo'jayin paydo bo'lmagan. Mart oyida FIFA o'z rasmiy saytida qarorini e'lon qildi. Patino CASga murojaat qildi - va u yerda ham tashkilotchilar tarafini olishdi.
Shu tariqa Xames Rodriges KJCHdan quruq qoldi. Ammo, endilikda u yerda Jiru va Lorisni ko'ramiz.
