"Локомотив": Жасур Ҳасанов 2 та ўйинга четлатилди

“Локомотив” – “Ал-Иттиход” ўйинининг 90-дақиқасида австралиялик ҳакам Бенжамин Жон Уильямс майдондан четлатган Жасур Ҳасанов чемпионлар лигасининг навбатдаги икки ўйинида жамоага ёрдам бера олмайди. ОФК тартиб-интизом қўмитаси мана шундай қарор чиқарди.

Ўйиннинг 89-дақиқасида Сардор Мирзаев ҳисобни тенглаштирганидан сўнг, “Локомотив” футболчилари учрашувни тезроқ давом эттириш ҳаракатига тушишди. Жасур Ҳасанов бу йўлда тўпни майдон марказига тезроқ олиб келишни истади, Фаҳад Ал-Муваллад эса тўпни беришни хоҳламади, натижада икки ўртада келишмовчилик юзага келди. Ҳакам вазиятни чигаллаштиришни истамай, ҳар икки футболчига тўғридан-тўғри қизил карточка кўрсатди.

Чемпионлар лигасидаги навбатдаги икки турни “Локомотив” сафарда “Ал-Иттиход” ҳамда Эроннинг “Фулад Сепахон” клубларига қарши ўтказади. Улар мос равишда 1 ҳамда 15 март саналарига тайин қилинган. Кўрсатилган тўғридан-тўғри қизил карточка сабаб Жасур Ҳасанов март ойидаги халқаро ўйинларда иштирок этмайди. 4-тур 6 апрель санасига белгиланган.