Лочин Солиев: “Яна олий лигада ўйнашга кучим етади. Лекин футболдан кўнглим совуб кетмоқда”

Аммо 33 ёшли футболчи бугунги кунда ҳеч бир клуб таркибида кўриниш бераётгани йўқ. Хўш, Солиев бутсаларини михга илишга қарор қилдими ёки бунга бошқа сабаблар борми? Шу ва бошқа саволларга жавоб топиш мақсадида Лочиннинг ўзига мурожаат қилдик. 

-Олий лига жамоаларининг мавсумга тайёргарлиги айни қизиган паллага келган бўлсада, сизни ҳамон ҳеч бир клуб таркибида учратмаяпмиз. Буни изоҳлайсиз?

- Тўғри, ҳозир ҳамма жамоа тайёргарлик зўр берган. Лекин мен шунга қарамай уйдаман. Бу йил яна футбол ўйнайманми йўқми, аниқ бир қарорга келмадим. Очиғини айтганда, футбол ўйнашдан кўнглим совуб бормоқда. 

- Ўтган йили оёғингизни операция қилдирганингиздан хабаримиз бор. Шундан сўнг тикланиш қийин бўляптими?

- Бу борада муаммо йўқ. Операция яхши ўтди ва тикланиш жараёни ҳам кўнгилдагидек кечди деб ўйлайман. Бугунги кунда яқин дўстларим билан сунъий майдонда мини футбол ўйнаб турибман. 

- Сизни “Андижон” билан расман хайрлашди десак бўладими?

- Ҳа, жамоадан кетганим аниқ. 

- Олдингизда бошқа вариантлар борми?

- Очиғини айтганда, ҳеч бир клубдан жиддий таклиф бўлмади. 

- У холда  биринчи лига жамоаларидан таклиф тушса қабул қилишингиз ҳам мумкинми?

- Биласизми ҳозир олий лигада ҳам бемалол ўйнаб кетишимга ишонаман. Бунга ақлим ва қуч-қувватим етади. Лекин иштиёқ сўниб бормоқда. Сўнгги йиллардаги мен билан юз берган омадсизликлардан сўнг ҳафсалам пир бўлди.  

- Омадсизликлар асосан жарохат билан боғлиқ деб ўйласизми ёки бошқа сабаблар ҳам борми?  

- Энг аввало “Андижон”да ишлаган мураббийларнинг менга бўлган ишончсизлигини айтган бўлардим. Қолаверса айрим кишилар менга бошида катта ишонч билдириб кейинчалик ўзгариб кетти. Футболчи учун энг кераклиги аввало ишончдир. Мураббийлар кўпинча футболчи етишмаётган пайтда фойдаланганида, ҳафа бўлиб кетасан киши. Наҳотки шу даражага тушиб қолдик дея. Қолаверса алдовлар кўп бўлди. Бу ҳам қайсидир манода руҳан синдирди. 

- Катта футбол билан хайрлашиш арафасида турибсиз эканда?

- Олдиндан бир нима деб бўлмайди. Ёшим ўтиб бораётганини инобатга олсак, ёшларга жой бўшатиш кераклигини тушуниб боряпман. 

- Келгусида ўзингизни мураббий сифатида синаб кўрасизми ёки умуман бошқа соҳага ўтасизми?

- Футболдан бирдагина кетиш ҳам қийин. Чунки у менинг севимли машғулотим бўлган. Мендан қандай мураббий чиқишини эса вақт кўрсатиб беради. Футболда ишлаб, бошқа соҳа билан ҳам шуғулланишни режа қилганман. Фарзандларимиз катта бўлмоқда. Уларни келажакда яхши инсон бўлиб етишиб чиқиши учун ҳозирдан харакат қилишимиз зарур. 

Исломбек Рустамбеков суҳбатлашди.