Лингард ёзда МЮдан кетмоқчи. Томонлар янги битим борасида келиша олишмади

"Манчестер Юнайтед" клуби ярим ҳимоячиси Жесси Лингард келаси ёзда клубни тарк этиш ниятида. Футболчининг амалдаги шартномаси ҳам айнан 2022 йилнинг ёзида ўз якунига етади. 

The Times берган маълумотларга қараганда, клуб ва ўйинчи янги битим борасида келиша олишмади. Лингард бу масалага бошқа қайтишни хоҳламаяпти. Бунга сабаб, МЮ музокараларда футболчига ҳозиргидан камроқ маош таклиф қилган. Бу эса футболчининг ҳафсаласини пир қилган. Футболчига Англия ташқарисидан ҳам бир неча таклифлар бор.

Эслатиб ўтамиз, мавсум бошида Оле-Гуннар Сульшер Жесси Лингардни қолдиришга кўндирганди ва унга ўйин амалиёти берилишини маълум қилганди. Аммо, футболчи бор-йўғи Лига Кубогидаги "Вест Хэм"га қарши ўйинда бошланғич таркибда майдонга тушди.