Линделёф ўйнаётган пайтда унинг уйига номаълум шахслар бостириб киришди

Ушбу воқеа чоршанба куни 27 ёшли швед футболчиси Премьер-лига доирасида "Брэнтфорд"га қарши ўйнаётган пайтда содир бўлган.

Футболчининг рафиқаси Майянинг айтишича, босқинчилар Манчестердаги уйларига бостириб киришидан олдин у ўз хонасиини қулфлаб олиб, кичкинтой болалари билан яширинишга муваффақ бўлган.

"Вазиятдан келиб чиқиб айтадиган бўлсак, аҳволимиз яхши. Лекин, бу ҳолат мени ва болаларни жуда қўрқитди. Ҳозир биз Швециядамиз, оиламиз билан вақт ўтказяпмиз", — деб ёзди Майя Инстаграм саҳифасида.

"Манчестер Юнайтед" бош мураббийи Ральф Рангник бугун Викторга дам берди ва уни 22 январь куни "Вест Хэм"га қарши ўйинга чақирмади.

"У нима содир бўлганини айтди. Линделёф хотини ва болаларини ташлаб кетмоқчи эмас. Биз бугун у машғулот ўтказмаслигига, эртага эса ўйнамаслигига келишиб олдик", - деди немис мураббийи.