"Ли Ман" бош мураббийи Чан Хиу Минг: "Биз ҳеч нарсадан қўрқаётганимиз йўқ"

"Авваламбор ассалому алейкум. Сизларни кўриб турганимиздан хурсандмиз. Ҳозирги пандемия шароитида Қарши шаҳрига етиб келиш учун 2 кун вақт сарфладик. "Насаф" кучли жамоалардан бири. Улар ўз майдонида ва мухлислари қаршисида тўп тепади. Биз ҳам яхши тайёргарлик кўриб келдик. Майдонга ҳар доим ғалаба учун чиқамиз",- дейди Чан Хиу Минг. 

"Жамоамиз эртанги ўйинга тайёр. Насиб қилса яхши ўйин кўрсатишга ҳаракат қиламиз",- дейди футболчи Нган Лок Фунг. 

- "Насаф" жамоасини қай даражада ўргандингиз?

- Рақиб яхши шаклланган жамоа. Қанотлардан кескин ҳужумлар ташкил қилади. Ўзбекистон Суперлигасида кучли ўйин кўрсатмоқда. Эртага ғалаба қозонишга ҳаракат қиламиз. 

- Жамоа олдига ОФК кубоги ва ички чемпионатда қандай мақсадлар қўйилган?

- Жамоамиз жуда ёш жамоа. Ташкил топганига 4 йил бўлди. ОФК кубогида илк бор иштирок этмоқдамиз. Лекин биз ҳеч нарсадан қўрқмаймиз. Миллий терма жамоа аъзолари ҳам кўпчиликдан иборат. Олдимизга доим чемпионликни мақсад қилиб қўямиз. 

- "Насаф" халқаро майдонда жуда ҳам тажоввузкор ўйин кўрсатади. Эртага ҳам ўз майдонида ўйнайди. Вазиятга реал баҳо берсак "Ли Ман" эртага иккинчи рақам остида ўйнайдими ёки ҳужумкор футбол кўрсатишга жамоанинг имкониятлари етадими?

- Биз икки кун йўл юриб келдик. Лекин ҳозир нормал ҳолатдамиз. Ўйинга тайёрмиз, дея оламан. Ўйин давомида кўрсатамиз. 

- Ўзбек футболи ҳақида қандай маълумотга эгасиз?

- Ўзбекистон ҳақида нима дейишим мумкин? Кўриниб турибди шаҳарлар чиройли. Вазият яхши бўлиб кетганда келиб яна бемалол кўришим мумкин. Чунки меҳмонхонадан ташқарига чиққанимиз йўқ. ФИФА рейтингига қарасак ҳам Ўзбекистон биздан юқорида. Футболчиларингиз агрессив ҳаракат қилади. 

- Қаршига ўзингиз истаган таркиб билан етиб келдингизми? Жароҳатлар ва йўқотишлар борасида маълумот бера оласизми?

- Жиддий жароҳат олган футболчиларимиз йўқ.