Кўзи ёшланган “қалдирғоч”, Кападзе учун сўнгги бекат ёхуд финал

Бу совуқ ҳавода иссиққина хонада ўтиришдан яхшиси йўқ. Футбол кўргиси келган одам учун эса бундай совуқда телевизор энг қулай вариант. Аксига олиб футбол вақти куннинг қоқ ўртасида. Кимдир ишда, кимдир ўқишда, қисқа қилиб айтганда, ҳамма ўз ташвишлари билан банд. Финалга кимдир иши туфайли, бошқа биров совуқ сабаб келолмаслиги мумкин.
Ўзбек футболига бефарқ бўлмаган ва бугунги финалга кириш имкониятига эга бўлган мухлислар аҳамияти жиҳатидан мавсумнинг энг муҳим учрашувини стадиондан кузатишларига ишонгим келади.

"Локомотив" "олтин дубль" қайд этиш бўйича дубль қилмоқчи. Жамоа етаксичи ва сардори Тимур Кападзе учун эса янада аҳамиятли ўйин. "Локо" футболчилари аввало Ўзбекистон кубоги учун, шунингдек, жамоадошлари, акалари Кападзе учун ҳам икки ҳисса куч билан ўйнашларига шубҳа йўқ. Финалда "Локомотив" тарафдорлари ҳам анча кўпайган.

Кимдир Кападзени футболчилик фаолиятидаги сўнгги баҳси бўлаётгани учун "Локо"га мухлислик қилиши мумкин. Ҳар ҳолда Ўзбекистонда Кападзенинг мухлислари ҳам етарлича топилади.

"Пахтакор" мухлислари ҳам ўз суюклиларини келаси мавсумда ОЧЛда ўйнашни исташади ва шу боисдан ҳам бугун стадиондан туриб "темирйўлчилар"ни қўллаб-қувватлашлари аниқ.

Қаршида ҳам 30 январь куни "Марказий" стадионда ОЧЛ плей-офф ўйини ўтказилишини ("Локомотив" ғалаба қозонса, унда "Насаф" ОЧЛ плей-офф ўйинини ўз майдонида, Иордания жамоасига қарши ўтказади. Аксинча бўлса, унда Қатарга сафар уюштиришади) истовчилар анча кўп. "Насаф" ишқибозлари ҳам табиийки "Локомотив"га мухлислик қилишади.

Айни пайтда "Локомотив" ички чемпионатдаги барча совринларни бегона қилмаяпти ва жамоа бу борада тезликни оширмоқда. Таркиб, маҳорат ва футболчилар танлови бўйича "Локо"га тенг келадиган жамоани топишни имкони йўқ.

Кайфият ҳам жойида. "Локомотив" аллақачон ғолиблик руҳига бурканган жамоага айланиб улгурди. Бир сўз билан айтганда, "темирйўлчилар" ютқазишни унутиб қўйишди. Бунда Мирко Йеличич ва Андрей Микялевнинг хизматларини ҳам алоҳида қайд этиш лозим.

Шундай тасаввур уйғонадики, финалда "Локо" яққол фаворитми? Кўпчилик ҳа, дейиши мумкин ва бунга асослар етарлича топилади.

"Бунёдкор"чи? Ўринли савол.

Келинг ушбу саволга жавоб излаб кўрамиз. Охирги йилларда "Бунёдкор" анча ёшартирилди. Ҳар йили мавсумни совринсиз якунламайдиган "қалдирғочлар"ни сўнгги йилларда парвози пасайди. Лушан ёшлар билан соврин ютиб беролмади. Лекин бир қанча истеъдод ва иқтидорларни чиқариб берганини унутмаслик керак.

"Бунёдкор"нинг ҳозирги кундаги ягона ишонган тоғи Миржалол Қосимов жамоага келгач биринчи қилган иши футболчиларга ёшликдаги "шўхликлар"ни унутиш кераклигини тушунтириш билан бошланди.

Футболчиларга ғолиблик руҳи, характер пайдо қилишга чоғланган Қосимов ёш "қалдирғочлар"дан тезроқ улғайишни талаб қилди. Уларни катта футболдаги чинакам ҳаётга бошлади, дейиш мумкин.

Зўр ўйнаб, ютқазишга кўникиб қолаётган жамоани натижага ўйнашга ўргатди. Эгнидаги либоснинг қиймати, клуб имижи каби масалаларга тўхталди.
"Бунёдкор" логотипи остида ўйнаш масъулиятини тушунтирди. Қосимов келган пайт чемпионатда 13-ўринда турган жамоа якунда мавсумни 4-ўринда тугатди.
Мураббий келганидан кейин ўтказилган матбуот анжуманида Қосимов "Бунёдкор" ҳар қандай шароитда ҳам юқори мақсадларни кўзлашини ва жамоа ОЧЛ йўлланмасига кубок орқали эришишга ҳаракат қилишини маълум қилганди.

"Бунёдкор" жамоаси чемпионатда ҳам балки совриндор бўлиши мумкин эди. Агарда ҳакамларнинг қўпол хатолари уларга қимматга тушмаганида. Лекин мағрур мураббий ҳечам бошқа гапга чечан ҳамкасбларига ўхшаб ҳакамлар уларни нечта голларини ҳисобламаганию, уларни ишига баҳо бериш билан чалғимади. Аламли ўйинлардан кейин ҳам индамади.

Ўша учрашувларни тезда унутиб, янги баҳсга тараддуд кўришни маъқул кўрди. Олий лиганинг охирги беллашувида футболчиси Рустам Ашурматовни йиғлатган пенальтидан кейин мураббий ёш шогирдини алмаштирди ва кийиниш хонасига киришидан олдин унга нималарнидир гапирди, уни юпатди.

Кечаги матбуот анжуманида ҳам "Локомотив"га қарши ўйинда рақибини симулация ишлатганида "айбдор" бўлган Рустам Ашурматовни олиб келгани бежиз бўлмаса керак.
Қосимов айтдики, ўша вазият Ашурматовни янада кучли қилган.

Бу ҳам Ашурматовни финалга тайёрлашда янада кўмаклашиши, қўшимча куч бериши мумкин. Кўзлари ёшланган Ашурматов финалда "Локомотив" билан ҳисоб-китоб қилиш имкониятига эга. Финалдан кейин кимнинг кўзи ёшланади, буни ўшанда кўрамиз.

Айтмоқчи бўлганим, бир чеккада ёлғизланиб қолган "қалдирғочлар" учун мавсумдаги энг муҳим баҳс эшик қоқмоқда.

"Локомотив" учун ҳам финал ва табиийки муҳим. Лекин аҳамият жиҳатдан "Бунёдкор" учун қадри баландроқ, қиймати юқори. "Локомотив"нинг таркиби қанчалик кучли ва тажрибали эканлигини қайд этдик. "Бунёдкор"да эса аксинча. Ҳозирги таркибдан Зуҳуров, Ғофуров, Иброҳимов ва Гадоев Ўзбекистон кубогига эга чиққан. Айнан шу тўрттала футболчида соврин мавжуд. Қолган футболчилар эса ҳали катта футболда ҳеч нарсага эришишгани йўқ.

Қосимов айтганидек, бугун уларни фаолиятида янги саҳифа очилиши мумкин. Ёш футболчилар эса жамоага Қосимов келганидан кейин дадил гапира бошлашди. Финал барча аламли ўйинлар, кўз ёшлар учун "қалдирғочлар" ҳисоб-китоб қилиб олишларига ажойиб имконият тақдим этади. Қосимов жорий мавсумдаги баъзи ўйинлардаги ноҳақликлар учун ҳам жамоасини ўзгача иштиёқ билан финалга тайёрлашига шубҳа қилмайман. "Бунёдкор" устози мураббийликдаги салоҳиятини бугун яна бир бор ишга солиши зарур.

Қосимов "Бунёдкор"нинг янги авлодини, парвози пасайган "қалдирғочлар"ни яна узоқ парвозга жиддий тайёрлагани аниқ. Мураббийликдаги қисқа танаффусдан кейин совринга "чанқоқ" бўлган Қосимов учун бу финал ўзгача аҳамият касб этади.

Айнан мана шу факторлар "Бунёдкор"ни финалдаги имкониятларини паст баҳоламаслик ҳамда "Локомотив"ни яққол фаворит, деб ҳисобламаслик учун етарли.

Футболда, айниқса финалда ҳар доим имкониятлар тенг бўлади. Муҳими, ҳиссиётларга бой, унутилмас ва қизиқарли финал гувоҳига айлансак бўлгани.

Ҳа-я, айтганча, иссиқроқ кийиниб олинг, 15:00да бошланадиган ўйин “лоторея” туфайли 18:00гача чўзилиб кетиши мумкин. Аҳир бугун финалку...