Клопп "Ливерпул"нинг "Сити" билан кураши ҳақида: "Эҳтимол кам, аммо шу ҳам етарли"

"Тўққизта ўзгаришдан кейинги ўйинимиз ҳам ажойиб. 0:1 ютқазаётганимизда, жаримадан гол уришимиз мумкин бўлган вазиятда психологияни кўрдим. Барча бундан бироз асабийлашди, аммо йигитлар ўзларини босиб олишганди. 

Биз ажойиб гол урдик, ўйиндан чиқиб кетмадик. Иккинчи таймда олдинга боришда давом этдик, тўпни яхши назорат қила олмаган вақтимизда ҳам вазиятлар бўлди. Сўнгра гол уриб, ҳисобни 2:1 кўринишига келтирдик ва барчаси жойига тушди. 

Топ ўйин, ақлбовар қилмас чиқиш, тўққизта ўзгариш. Бу режа футболчилар сабаб ишлади. Агар ўхшамай қолганида, 1000 фоиз менинг айбим бўларди. 

- Совриннинг эҳтимоли ҳалиям камми? 

- Албатта, эҳтимоли кам. Чунки "Сити" ўз уйида "Астон Вилла" билан ўйнайди, улар эса ("Вилла") пайшанба куни лигада қолиш учун курашаётган "Бёрнли" билан тўқнаш келишади. 

Аммо бу футбол. Ўйлайманки, ўшанда "Сити" (2019 йилда) 11 миллиметр сабаб чемпион бўлганди ("Манчестер Сити" ҳимоячиси "Ливерпуль" билан ўйинда дарвоза чизиғини деярли кесиб ўтган тўпни қайтариб юборганди).

Агар кимдир биз чемпион бўлишимизни истаётган бўлса, энг аввало ғалаба қозонишимиз керак. "Астон Вилла" эса "Сити"га қарши ўйинда очко ишлаши лозим. Бунинг имкони бор, эҳтимоли кам, аммо амалга ошиши мумкин. Шунинг ўзи етади", - деди Клопп.