“Фаолиятим давомида дуч келган энг қийин футболчилар орасига бир қанчасини қўшишим мумкин. Фаолиятим бошида бу Жон Терри эди. У жуда ақлли ҳимоячи бўлган, енгилмас ва ўзини назорат қила оладиган. У зарбаларимни қандай тўхтатишни биларди, шу туфайли бу мен учун ажойиб сабоқ бўлган.
Яна бир шундай ўйинчилардан бири Кьеллини эди. Табиийки, Италия ТЖ ва “Ювентус”га қарши ўйинларда унга тўқнаш келганман. У ҳақиқатан ҳам ақлли, кучли ҳамда жисмонан бақувват бўлган”, дейди Кейн.
Жон Терри футболчилик фаолиятининг асосий қисмини “Челси”да ўтказиб, 715 ўйинда 67+29 натижага эришган. У 2018 йил “Астон Вилла” сафида бутсасини михга илди.
Жоржо Кьеллини эса 17 йиллик фаолиятидан кейин ўтган мавсум охирида “Ювентус”дан кетиб, “Лос-Анжелес” билан шартнома имзолади. У туринликлар либосида 559 учрашувда қатнашиб, 36+25 кўрсаткич қайд этган.
