Камолиддин Мурзоев: "Финалда икки жамоага ҳам осон бўлмайди"

- Ушбу йилги мамлакат кубоги финалида ўтган йилги жуфтлик, “Пахтакор” ва Олмалиқ шаҳри жамоалари ўзаро тўқнаш келади. Шиддатли тус олиши кутилаётган ўйинда қайси жамоанинг имкониятларини юқори баҳолайсиз?
- Ҳолис инсон сифатида шуни айтишим мумкинки, бу йил “шерлар” анча шаклланган. Аввалги йилга қараганда барқарор. Клуб раҳбарларининг ўз олдига қўйган мақсадлари қийинлигига қарамасдан мехнат қилишда давом этишди ва унинг самарасини кўришди. Менимча Шота Арвеладзе шогирдларини имкониятлари бироз юқорироқ. Аммо, олмалиқликлар ҳам осонликча таслим бўлмаслигини тахмин қиламан.

- Мазкур ўйинда икки жамоа таркибидаги легионерлар барча нарсани ҳал қилишлари мумкинми? Гап Драган Черан ва Элгужа Григалашвили ҳақида кетмоқда...
- Ўйлашимча, “Пахтакор”нинг барча чизиқларида бугунги кундаги энг кучли хорижлик ва маҳаллий футболчилар йиғилган. Нафақат Черан, балки Машарипов, Сайфиев, Ҳамробеков, Ҳамдамов... Шу нуқтаи назардан Черанга осонроқ бўлади. Финал бу – финал. У ҳаётингиз давомида бир маротаба бўлади. Айниқса, ўртамиёна клубда тўп тепаётган бўлсангиз. Ўтган йили биз бир оила бўлиб, бир ёқадан бош чиқариб кубогни ўзимизники қилган эдик. Лекин, легионерлар асосий қаҳрамон бўлади деган фикрдан йироқдаман.

- Ижтимоий тармоқларда ишқибозларнинг билдирган фикрларига қандай муносабат билдирасиз? Эртага мухлислар катта саҳнага чиқишлари аниқ...
- Ҳар бир жамоанинг садоқатли ва фидойи жонкуярлари кўпайса ўйиннинг шиддати ва завқи ошаверади. Футбол мухлислар билан гўзал.

Абдулазиз суҳбатлашди