ЖЧ саралашдаги рақибимиз Саудия Арабистони Ямайка билан иккита ўртоқлик учрашуви ўтказади. Таркибга 28 футболчи чақирилди

Маълумки, Саудия Арабистони миллий терма жамоаси ЖЧ-2022 саралаш босқичида биз билан битта гуруҳда баҳс олиб боряпти ҳамда гуруҳда биринчи ўринни ким эгаллаши катта эҳтимол билан мана шу жамоага қарши баҳсдан сўнг ойдинлашади. 

Ўзбекистон терма жамоаси сентябрда Тожикистон, октябрда Эрон ва БААга қарши ўртоқлик учрашуви ўтказди. ЖЧ саралашдаги асосий рақибимиз Саудия Арабистони эса йил бошидан бери коронавирус сабаб ҳали биронта йиғин ўтказгани йўқ. 

Мана энди саудияликлар ноябрдаги ФИФА кунларидан фойдаланиб иккита ўртоқлик учрашувида майдонга тушишади ва ҳар иккала баҳс Ямайка терма жамоаси билан бўлиб ўтади. Ўйинлар 14 ва 17 ноябрь куни Ар Риёд шаҳридаги "Шаҳзода Файсал бин Фаҳд" стадионида ўтказилиши белгилаб қўйилган.

Франциялик мураббий Эрве Ренар мамлакат бош жамоасига 28 нафар футболчини таклиф этди. Улар орасида Ёсир Ал Шаҳрони, Салман Фараж, Муҳаммад Канно, Турки Ал Аммар, Салим Ал Довсари, Наваф Ал Обид, Фирас Ал Брикан каби юлдузлар бор.