Жасур Ҳакимов: “Пахтакор”да қолишни истайман. Лекин мен учун ўйин амалиёти муҳим”

Ўтган мавсум у жамоаси таркибида 22та ўйин ўтказиб, рақиблар дарвозасига 6та тўп киритган. Хуқуқий жиҳатдан “Пахтакор” футболчиси саналадиган Ҳакимов айни дамда “шерлар” машғулотларида иштирок этмоқда. Хўш, Жасур бу йил “Пахтакор”да ўйнайдими? Шу ва бошқа саволларга жавоб олиш мақсадида унинг ўзига мурожаат қилдик.

- “Пахтакор” билан беш йиллик шартнома тузгандим. У ҳамон ўз кучини йўқотгани йўқ. Шу боис хуқуқий жиҳатдан “шерлар”га тегишлиман. Ўтган йиллари “Сўғдиёна”да ижара асосида ўйнаб келаётгандим. Айни дамда эса “Пахтакор” иҳтиёрига қайтганман. Ҳозирча жамоа машғулотларида астойдил ишлаяпман.

- Келгуси тақдирим ҳақида ҳозирча тайинли гап айта олмайман. Яширмайман айрим клублар мени ўз сафига чорламоқда. Бу борада “Пахтакор” раҳбарияти билан маслаҳатлашган холда иш тутаман.  

- Ўзимга қолса бу йил ҳам гарчи ижара бўлсада, бошқа ўртамиёна жамоага бориб, кўпроқ ўйин амалиётига эга бўлганим маъқул. Чунки айни ўйнайдиган пайтим келганида “Пахтакор” захирасида ўтириш, бу – ўсишдан тўхтаб қолиш демакдир. Вазиятга реал баҳо берадиган бўлсак, ҳозир “шерлар” сафида ҳужумчи Игорь Сергеевга бўлган ишонч юқори. У миллий терма жамоа даражасидаги ўйинчи. Мураббий ўзига душман бўлмаса керак, уни захирага ўтказиб, мени асосий таркибда ўйнатгани. Яна ким билади дейсиз. Ҳозирча машғулотларда иштирок этяпман.

- Албатта, “Пахтакор”дек Осиёнинг энг кучли клубларидан бири бўлган жамоада ўйнаш шараф. Менимча ҳар қандай футболчи “шерлар” таркибида ўйнашни истайди. Осиё чемпионалар лигасида ўйнаш имкониятини юзага келади. Бироқ гап ўйнаш ўйнамасликда.

- Яқинда Даврон ака Файзиев билан учрашиб, гаплашганимда яна “Сўғдиёна”га қайтишим борасида фикримни сўради. Аммо назаримда жиззахликлар яна мени ижарага олиб ўйнатишни унчалик истамаётгандек. Олдимда бошқа вариантлар ҳам йўқ эмас. Аммо якуний қарорни “Пахтакор” раҳбарияти чиқаради – дейди Жасур Ҳакимов.

Исломбек Рустамбеков.