Мазкур сана муносабати билан Ўзбекистон футбол ассоциацияси биринчи вице-президенти Равшан Ирматов ФИФА президенти раҳбарлигида ўтган ўн йиллик фаолиятни ёдга олиб, ушбу даврда жаҳон футболида амалга оширилган ислоҳотларни эътироф этди.
— Сўнгги ўн йил давомида Жанни Инфантино раҳбарлигида ФИФА футболни чин маънода глобал даражага олиб чиқди. Ушбу давр Ўзбекистон учун ҳам янги имкониятлар даври бўлди. "FIFA Forward" дастури орқали юртимизда тўртта янги машғулот майдони барпо этилди, стадион инфратузилмаси реконструкция қилиниб, футболимиз ривожи учун мустаҳкам пойдевор яратилди.
Шунингдек, FIFA Futsal World Cupга мезбонлик қилиш халқаро турнирларни энг юқори савияда ташкил этиш борасида мамлакатимиз учун муҳим тажриба бўлди. Энг муҳими, Жаҳон чемпионати иштирокчилари сонининг 48 тага кенгайтирилиши Ўзбекистондаги 38 миллиондан ортиқ инсоннинг орзусини рўёбга чиқарди ва бутун халқимизни ягона мақсад атрофида бирлаштирди, — дея таъкидлади Равшан Ирматов.
Маълумот учун, Жанни Инфантино 2016 йил 26 февраль куни ФИФА президенти лавозимига сайланган бўлиб, ташкилот тарихидаги тўққизинчи президент ҳисобланади.
