Искандар Шойқулов: "Бунёдкор"нинг кучли томонларини бартараф қилишни уддасидан чиқдик"

Ушбу учрашувда меҳмонлар майдон эгаларига муносиб қаршилик кўрсата олди ва якунда бир очкога эга чиқди. Ўйиндан сўнг "Сўғдиёна"нинг тажрибали футболчиси Искандар Шойқулов сайтимизга фикрларини билдириб ўтди.

"Бунёдкор" майдонида кетма-кет иккинчи бор дуранг қайд этдик. Боз устига кубок баҳси бўлгани учун асосий таркибнинг бир нечта футболчиларига дам берилди. Уларнинг ўрнига майдонга тушган ёш футболчилар ҳам ўзларини кўрсатишга ҳаракат қилишмоқда. Умуман олганда ўйин икки жамоа учун ҳам яхши ўтди, дея оламан. Айрим вазиятларда хатога йўл қўймаганимизда ғалаба қозонишимиз ҳам мумкин эди. 

Кейинги босқичга чиқишимиз учун имконият бор. Ўз майдонимиздаги ўйинда ғалаба қозонишимиз шарт. 

Уч кун олдин "Насаф"га қарши оғир ўйин ўтказгандик.  "Бунёдкор" билан баҳсга тикланиш қийин бўлгани йўқ. Чунки мавжуд вазиятга кўникиб бормоқдамиз. Рақибнинг кучли томонларини билардик ва буни бартараф этишни уддасидан чиқа олдик, деб ўйлайман", - дейди Шойқулов.