Интервью. Илҳом Юнусов: "Ҳоким кубоги" ташкилотчиларига раҳмат"
31 янв 2019 10:51
Янгиликлар

Интервью. Илҳом Юнусов: "Ҳоким кубоги" ташкилотчиларига раҳмат"

Фарғона вилояти "Ҳоким кубоги-2019" мусобақасининг "В" гуруҳи 1-тури доирасида ўтказилган "Шердор" - "Қўқон-1912" (1:3) учрашувидан сўнг Илҳом Юнусов сайтимизга интервью берди.

- Футболга кириб келишингиз қандай кечган?
- Дастлаб футболга кириб келишим Самарқанд футбол мактаби орқали бошланган. Айнан Самарқанд футбол мактабида футбол бўйича илк билимларимни олганман.

- Футболдаги биринчи мураббийингиз ким бўлган?
- Менинг футболдаги биринчи мураббийим раҳматлик Қаҳрамон Маматқулов бўлган. У киши вафот этганлар, жойлари жаннатда бўлсин, доим ҳақларига дуодамиз.

- Катта футболда биринчи қайси жамоа сафида дебют учрашувини ўтказгансиз?
- 2001 йил "Бухоро" жамоаси сафида илк учрашувимни ўтказганман. Ўша вақтлари Олий лига деб аталган турнирда айнан "Бухоро" жамоаси сафида иштирок этганман.

- Ўйнаган клубларингиз ҳақида маълумот берсангиз...
- Юқорида айтганимдек, дастлаб "Бухоро" жамоаси сафида майдонга тушганман. Кейинчалик Самарқанднинг "Динамо", Қаршининг "Насаф" ва Навоийнинг "Қизилқум" жамоаларида ўйнадим. Ўтган мавсумда хабаринглар бор, яна Самарқанднинг "Динамо" клуби сафида Про-Лига мусобақаларида иштирок этдим.

- Фарғона вилоятида анъанавий тарзда ўтказилиб келинаётган "Ҳоким кубоги" мусобақасига муносабатингиз...
- "Ҳоким кубоги" мусобақаси ҳақида яхши тасаввурга эгаман. Илгари ҳам ушбу мусобақада иштирок этганман. Умуман олганда, ташкилотчилар бу мусобақани юқори даражада ўтказишади. Бу йил ҳам ушбу мусобақада иштирок этаётганимдан хурсандман. "Ҳоким кубоги" мусобақаси ташкилотчиларига "Шердор" клуби номидан миннатдорчилик изҳор қиламан.

- "Шердор" клубига келишингиз ҳақида...
- "Шердор" клуби бош мураббийи Бахтиёр Саттаров билан яхши танишмиз. Айнан унинг таклифига кўра жорий мавсумдан "Шердор" клуби сафига қўшилдим. Бу клубда менга ўйновчи мураббий сифатида учрашувларда иштирок этиш вазифаси юклатилган. "Шердор" курашувчан жамоа, бу жамоа сафида футбол учрашувларида иштирок этаётганимдан хурсандман.

- Сизнингча ҳозирги кунда ўзбек футболида энг кучли футболчи ким?
- Шубҳасиз Одил Аҳмедов! Мен айнан уни энг кучли футболчи деб биламан.

- Энг кучли мураббийчи?
- Нима дейиш мумкин? Бошқа мураббийлар ҳафа бўлишмасину, мен учун Рўзиқул Бердиев.

Бекзод Толибов суҳбатлашди.

Ҳавола :

Манба : championat.asia

Янгиликларни Телеграмда ўқинг!

Рейтинг: +3