Интервью. Ака-ука Абдухолиқовлар ҳеч баҳс бойлашганми?

Темурхўжа ўтган йил "Локомотив" билан Ўзбекистон чемпиони ва Кубок соҳиби, бундан ташқари, олий лигада 22та гол билан тўпурар бўлди. У ҳозирда Қатарнинг "Ал Сайлия" клубида фаолият олиб боряпти.

Орифхўжа эса биринчи лига вакили "НБУ-Осиё" ҳужумчиси ҳисобланади. У жорий мавсум ҳозирча 16та гол билан биринчи лиганинг энг яхши тўпурари бўлиб турибди. Ака-ука ҳужумчилар сайтимизга интервью бериб бир қатор қизиқ саволларга жавоб қайтаришди. Қизиқ, улар бир-бирлари билан ҳеч баҳс бойлашиб кўришганми? Бу саволга ҳам қуйидаги интервьюда жавоб топасиз.

- Темурхўжа, бу йил ҳисобидан мавсумнинг иккинчи ярмини Қатарда ўтказдингиз. Таассуротлар қандай?
- Қатарга борганимда у ерда иккинчи давра бошланган, мавсум айни қизғин паллага кирганди. Лекин клубим "Ал Сайлия" пастки ўринларда эди. Қатарда чемпионат якунида тўртта жамоа элитадан тушиб кетади. Бизнинг жамоа олдига қўйилган мақсад олий лигада жон сақлаб қолиш бўлиб бунинг учун ҳамма бор кучи билан ҳаракат қилаётганди. Биринчи борганимда тўғриси жисмоний ҳолатим тўлиқ эмасди, чунки бизда ҳали мавусум бошланмаган, энди тайёргарлик кетаётганди. Шу боис бошида анча қийналдим.

- Жамоага мослашиш учун қанча вақт ёки бўлмаса нечта ўйин керак бўлди?
- Икки-учта ўйин керак бўлди деб ўйлайман. Аслини олганда, биз учун ҳар бир баҳс финалга тенг эди. Жамоаларнинг очкоси бир-бирига яқин бўлгани учун ғалаба қозонсангиз 8-ўринга кўтарилишингиз, мағлуб бўлсангиз 12-ўринга тушиб кетишингиз ҳеч гапмасди.

- Сиз учун янги чемпионатда биринчи голни уриб олиш жуда муҳим эди. Ҳар ҳолда ҳужумчисиз. Айтинг-чи, бу қанчалик қийин бўлди?
- Биринчи голни урганимдан кейин орада икки-уч ўйин танаффус бўп қолди. Албатта, Қатарда легионер ҳисобланганим учун ўзига яраша босим бўлди. Чунки мендан гол уриш  ва максимал натижа кўрсатиш талаб этиларди.

 - Орифхўжа, акангизнинг Қатардаги голларини кўриб турдингизми?
- Интернет орқали деярли ҳамма голларини кўриб боришга ҳаракат қилдим. Қолаверса, бутун оиламиз билан акамга далда бериб турдик.

- Қайси голи кўпроқ ёқди?
- Ҳамма голлари ёқди. Чунки акамнинг ҳамма голлари жамоага ёрдам берди. Энг асосийси "Ал Сайлия" мавсумни 8-ўринда тугатиб, олий лигада қолишни уддалади.

- Темурхўжа, 8-ўриндан раҳбарият қониқдими?
- Йўқ қониқишмади, бу мавсум биз учун яхши ўтмади дейишди. Биринчи даврада кўп очколар йўқотилганди. Лекин энг муҳими, бу йил тушиб кетмадик.

- Қатар юлдузлар лигасида еттита гол урдингиз. Бу кўрсаткич сиз учун етарли бўлдими?
- Албатта, қанча кўп бўлса шунча яхши. Лекин бу ҳам ёмон эмас. Голлар ҳеч қачон ортиқчалик қилмайди.

- Умуман олганда Қатарда чемпионат савияси қандай?
- Энди нима десам бўлади, плюс томонлари ҳам, минус томонлари ҳам бор. Энг катта плюс тарафи Қатарда легионерлар савияси анча баланд. Ҳар ҳолда улар Ўзбекистонда ўйнаётган легионерлардан кучли. Минус томони эса дарвозабон ва ҳимоячилар бирмунча кучсиз. Қатар клублари айниқса ҳимояда тартибсиз ўйин намойиш этишади. 

- Демак, у ерда гол уриш осонроқми?
- Гол уриш ҳеч қаерда осон эмас. Фақат тўп дарвоза тўрига киргандан кейин ҳаммаси осон бўлиб кўринади. Қатар клубларидаги шароит юқори, инфратузилма кучли, шунингдек майдонлар ҳолати ҳам зўр.

- Биздан кўп ўйинчилар борса ўйнаб кета олишадими?
- Ҳаммаси футболчининг ўзига боғлиқ. Легионер бўлиб борса босим ҳам шунга яраша бўлади. У ерга боргандан кейин маҳаллий ўйинчиларга қараганда бир бош устун бўлиш керак.

- Биз кўпинча араб футболчилари бирмунча дангаса, уларда пулдан муаммо йўқ, шунчаки ҳавас учун футбол ўйнашади деган гапларни эшитиб қоламиз. Қатарда маҳаллий ўйинчиларнинг футболга муносабати қанақа?
- Футбол улар учун хоббидек кўринади, лекин араблар дангаса эмас. Улар ҳам машғулотларда ҳамма қатори ишлайди. Лекин у ерда барибир легионерларга кўпроқ пул тўланади. Ким кучли бўлса ўша кўп ҳақ олади. Нафақат аралбларда, балки дунёдаги барча миллатда дангаса ёки бўлмаса ишчан одамлар учрайди.

- У ердаги машғулотлар бизникидан фарқ қиладими?
- Деярли катта фарқ йўқ. Ҳозир ҳамма машғулот ўтказиш тартибини ўрганиб олган ва секин-аста ҳамма жойда машғулот ўтказиш услуби бир хил бўлиб бормоқда.

- Сиз учун қайси бири қизиқ: олий лигада тўп тепишми ё Қатар чемпионатидами?
- Иккаласи ҳам қизиқ. Олий лигада кўпчиликни танийсиз, ўйинни оилангиз, қариндошлар кузатиб боришади. Қатарда эса сиз кучли эканлигингизни кўрсатиш мақсадида тўп тепасиз. У ерда Қатар халқи учун ўйнайсиз, қўлингиздан нима келишини исботлашга ҳаракат қиласиз.   

- Энди кейинги режалар қанақа?
- Январда "Ал Сайлия" билан бир ярим йиллик шартнома тузгандим. Шунинг ярим йили ўтди. Менимча, шартномам охиригача шу клубда қоламан, кейин нима бўлишини эса вақт кўрсатади.

- "Ал Сайлия" ўзингизга қанчалик маъқул келди?
- Ёмон эмас, муҳими, бу клубга тезда киришиб кета олдим. Жамоадошларим ҳам яхши футболчилар. Легионер сифатида ўзимни иккинчи бор четда синаб кўриш мен учун ҳам қизиқ эди. Ўзимда ўсиш бўлгани сезиб турибман: ҳам руҳий, ҳам тактик ва жисмоний томонлама.

- Қатар чемпионатига мухлислар ташрифи қай даражада?
- Жудаям ачинарли ҳолатда. Стадионлар бўм-бўш, бизда уларга нисбатан ҳартугул одам кўп. Ўзи Қатар давлатининг халқи кам, ҳудуди ҳам кичик. Қатарликлар мухлислар ташрифи бўйича Ўзбекистонга ҳавас қилса арзийди.

- Нима деб ўйлайсиз, "Ал Сайлия" янги мавсумда чемпионлик учун кураша оладими?
- Клуб курашмаса ҳам ўзим учун шунга ҳаракат қиламан. Негаки фаолиятим давомида учинчи ўриндан пастга тушмаганман. 8-ўрин мен учун янгилик бўлди. "Ал Сайлия" икки йил олдин чемпионатни тўртинчи ўринда тугатган, Амир Кубогида финалга қадар етиб борганди. Демак, жамоамизда салоҳият бор. Ҳаракат қилсак ҳаммаси бўлади.

- Энди укангиз Орифхўжани ҳам суҳбатга тортсак. Орифхўжа, ҳужумчи бўлишингизга ким сабабчи бўлган?
- Биринчи навбатда дадам. Дадам ҳам мураббий ва мени ёшлигимда ҳужум чизиғига қўйиб кўргандилар. Шунингдек, бошқа чизиқларда ҳам ўйнаганман. Лекин якунда ҳужумга тўхталганмиз. Акам ҳам кўп маслаҳатлар берган.

- "НБУ-Осиё"га бориш варианти қандай юзага келганди?
- Олдинги йил қишда кўрикка бориб машғулотларда қатнашгандим. Биринчи йил ўйиним унчалик чиқмади. Лекин бу йил ҳозирча ҳаммаси яхши кетмоқда.

- Биринчи лиганинг биринчи даврасида 16та гол урдингиз. Буни яхши кўрсаткич деса бўлади. Сизнингча, биринчи лигада тўп киритиш осонми?
- Акам айтиб ўтганидек, ҳужумчи гол урганидан кейин ҳаммаси осон бўлиб кўринади. Аслида ҳаммаси меҳнатга боғлиқ.

- Биринчи лигада кучли клублар кўпми?
- Айниқса, бу йил кучайиш бўлди деб ўйлайман. Биринчи ўринда бораётган "Цементчи", шунингдек "Андижон", "Сурхон", "Истиқлол" клублари ўзига яраша кучга эга.

- Қайси ўйинлар қийин бўлди?
- Энг қийини деб "Ўз-Донг Жу"га қарши баҳсни айтган бўлардим. Ўшанда биз 2:1 ҳисобида ғалаба қозондик. Бундан ташқари, "Андижон" билан ўйин ҳам ўзига яраша қийин кечди.   

- "НБУ-Осиё"да олий лигага чиқиш ҳақида гап-сўзлар бўляптими?
- Бу ҳақда яққол гапиришгани йўқ, лекин ўзимиз биринчи ўринни олиб олий лигага чиқишни хоҳлаяпмиз.

- "Цементчи"дан ўтиб кетса бўладими?
- Орамиздаги фарқ олти очко бўлиб турибди. Ҳаракат қилсак ўтиб кетамиз. Балки насиб қилиб қолар.

- Сизнингча, Ўзбекистоннинг энг кучли ҳужумчиси ким?
- Мен учун акам Темурхўжа Абдухолиқов доим биринчи рақамли ҳужумчи бўлиб қолади. Акам бўлгани учун эмас, балки шундоқ ҳам кучли ҳужумчи деб ҳисоблайман.

- Биринчи лигада 16та гол урган футболчи билан ёзги танаффусда олий лига клуби қизиқиб қолса қандай йўл тутасиз?
- Аввало катталар билан маслаҳатлашаман. Яъни, мураббийимиз Руфат ака Акрамхўжаев, шунингдек дадам билан. Ҳаммаси ўзимга боғлиқ эмас. Қолаверса, ҳозир бор эътиборимни "НБУ-Осиё"даги ўйинимга қаратганман. Лекин ўзимга қолса бу мавсумни шу жамоада тугатишни хоҳлайман.

- Ҳеч ака-ука ким кўп гол уриш бўйича баҳслашиб кўрганмисиз?
Т.Абдухолиқов: - Ҳа бир марта шундай бўлганди. Унда укам "Локомотив"нинг иккинчи лига жамоасида ўйнарди. Икки йил олдин баҳс бойлашгандик. Укам 30тадан кўп гол уриб мендан анча ўзим кетганди.

- Темурхўжа, ниҳоят бу йил Ўзбекистон миллий терма жамоасида дебют қилдингиз. Таассуротлар қандай?
- Энди таассуротлар кўп ҳам яхшимас. Негаки Сурия билан кечган баҳсда ютқазиб қўйдик. Лекин Худога шукур ҳозирча имконият бор. Агар насиб қилган бўлса жаҳон чемпионатига чиқамиз.

- Ён атрофдан футболчиларнинг терма жамоага боргиси келмай қолди деган гапларни эшитяпмиз. Ростан шунақами?
- Йўқ, унақамас. Балки четдан шундай кўринаётган бўлиши мумкин. Ҳар бир футболчи миллий термада ўйнашни хоҳлайди ва ўзини ҳурмат қилган ўйинчи чақирилмаса хафа бўлади. Ўйинимиз қовушмаган пайтларда одамлар шундай хаёлга борган бўлишлари мумкин.

- Эрон билан ўйин шунчалик қийин бўлдими?
- Эрон унчалик кучли эмасди. Ҳар ҳолда бемалол ўйнасак бўларди. Лекин ҳамма айб ўзимизда, чунки ўз даражамизда ҳаракат қила олмадик. Ўша куни Эрон бизни ютмади, балки ўзимиз ютқазиб қўйдик.

- Жуда кўп танқидий фикрлар билдириш давом этаверса бу футболчиларга қанчалик таъсир қилади?
- Ёки футболни ташлаб юборамиз, ё бўлмаса жаҳон чемпионатига чиқиб кетиб қоламиз. Ё ҳаммаси бузилиб кетади, ё зўр бўлиб кетади. Эсингизда бўлса, Осиё Кубоги-2011 олдидан Вадим Абрамовни кўпчилик танқид қилганди. Мен ўзим ҳам ҳайрон қолгандим, Абрамов нима қилмоқчи деб. Лекин Осиё чемпионатида яхши иштирок этганимиз кўпчиликнинг ёдида. Шахсан мен барча танқидлар тўғри ыабул ыиляпман, чунки халқимиз узоқ йиллардан бери жаҳон чемпионатига боришимизни кутяпти.  

- Азиз Ҳайдаров интервью бериб, биз ўзи чиқишга тайёрмизми, чиққан билан у ёққа борсак нимага эришамиз деган маънода гапирди.
- Эрон тайёр деб ўйлайсизми? Уларда чемпионат биздан баттар-ку. Майдон чимлари ҳам яхши эмас, қолаверса ёпиқ давлат. Қатар тайёрми? У ерда ички чемпионат ўйинларига одам кирмайди. Биз учун муҳими чиқиб олиш, агар жаҳон чемпионатига чиқсак бир йил ичида ҳамма тайёр бўлади. Бу борада менинг фикрим шу: тайёр бўлсак-бўлмасак халқимиз учун, халқнинг дуосини олиш учун мундиалга боришимиз шарт.

- Жаҳон чемпионатга боришни ҳамма сиз каби хоҳлаяптими?
- Албатта. Терма жамоага келган футболчи борки жаҳон чемпионатига борсам дейди. Чунки бу бизнинг орзумиз! Масалан, сиз журналист сифатида кимдан интервью олишни хоҳлайсиз?

- Айтайлик, Гвардиоладан.
- Демак, биз ҳам ўз соҳамиздан келиб чиқиб машҳур футболчиларга қарши ўйнасак деймиз. Лекин футболда хоҳиш бошқа, ишонч бошқа. Хоҳиш ҳаммада бор, лекин ишонч кимдадир кўп бўлади, кимдадир кам. Мухлислар бекорга танқид қилаётгани йўқ, улар фақат бир нарсани хоҳлашяпти: Ўзбекистон жаҳон чемпионатига чиқишини.

- Саралашда Қатарнинг Жанубий Кореяни мағлуб этиши биз учун босимни яна кучайтирадими?
- Йўқ, аксинча бу бизга ёрдам беради. Эндиликда ҳаммаси ўз қўлимизда. Иккита ўйинни ютсак бўлди, жаҳон чемпионатидамиз. Босим ҳар доим бўлган ва бунга тайёр туриш керак. Жаҳон чемпионатига чиқсак ҳам босим камайиб қолмайди. Мундиалга бориб шарманда бўлиб қолмайлик, яхши ўйин кўрсатиш керак деган маънода босим давом этаверади. Лекин барибир чиқишимиз керак.

- Мана энди терма жамоа олдида иккита ўйин қолди. Сиз бу ўйинлардан нима кутяпсиз?
- Шахсан мен футболчи сифатида иккита учрашувда ҳам ғалаба қозониб жаҳон чемпионатига боришимизни кутяпман. Агар ҳамма ўз даражасида ўйнаса, Хитойни ҳам, Жанубий Кореяни ҳам мағлуб эта оламиз. Чунки бу жамоалар олдингидек кучга эга эмас. Ҳаммаси ўзимизга боғлиқ.

- Бу ўйинларда бош мураббийнинг роли қандай деб ўйлайсиз?
- Бош мураббийнинг роли жуда катта аҳамиятга эга деб ўйлайман. Чунки у режиссёр! Мана шу иккита баҳс мураббийлар учун ҳам, футболчилар учун ҳам ҳаёт-мамот жанги бўлади.

- Темурхўжа, Орифхўжа вақт топиб "Championat.asia" сайтига ташриф буюрганингиз учун ўз миннатдорчилигимизни билдирамиз. Келажакдаги фаолиятингизга омад тилаймиз, янада кўплаб голлар уриш насиб қилсин.

Х.Холиқов суҳбатлашди.