Интернет сайт асосчиси – Европа Лигаси ярим финалчиси мураббийи

Европа Лигаси ярим финали қуръаси шафқатсизлиги билан эътиборимизни тортгани бор гап.  

"Марсель"га қарши кураш олиб борган "Зальцбург" клуби охиргача курашди ва жамоа вакилларига ҳеч қандай эътироз билдириб бўлмайди. Умуман олиб қараганда, Европа Лигаси ярим финалига етиб келиш ҳам Австрия вакили учун ижобий натижа. "Ред Булл Зальцбург"нинг бу қадар муваффақиятли иштирокида иккинчи мураббий Рене Маричнинг хизматлари катта.

Рене футболчилик фаолиятини эндигина 20 ёшга тўлганда якунлашига тўғри келди – оғир жароҳат спортчи орзулари билан ҳисоблашиб ўтирмас экан. Ҳаёт режалари барбод бўлганига қарамай, Рене оёққа туриш учун ўзида куч топа олди. У "Ханденберг" бош мураббийига кўмаклаша бошлади ва параллел равишда маҳаллий университетда таҳсил ола бошлади. Қайси факультет, у ердан "ким бўлиб чиқади" дейсизми? Қахрамонимиз футболни юракдан яхши кўрса ҳам, университетда психология факультетида таҳсил ола бошлади.  

Марич ностандарт қарорлар қабул қила олиши ва вазиятни, футболни чуқур анализ қилиши ўша вақтлардаёқ сезилганди. "Ўйиндан кейинги машғулотда Рене бизга ҳеч нима демасди, хатоларимизни айтиб, урушиб ўтирмасди. Шунчаки маълум машқларни бажаришимизни талаб қиларди. Орадан бир неча кун ўтибгина, биз ўша машқлар бизнинг охирги ўйиндаги хатоларимизни тушуниб, тўғрилашимиз учунлигини сезардик", – деганди "Ханденберг"нинг собиқ вакили Штефан Кирнстеттер.

Футбол клубидаги иш ва университетдаги ўқиш Маричга етарли эмасди ва у дўстлари билан 2011 йил Spielverlagerung номли сайтни ишга туширади – бугунги кунга келиб, айнан шу лойиҳа дунёдаги энг машҳур тактика сайти ҳисобланади. "Жароҳат сабаб фаолиятимни якунлагач, интернетда турли-туман маълумотлар ўқий, тўплай бошладим. Форумларда турли инсонлар билан суҳбатлашар, фикр алмашардим. Айнан шу орқали "Spielverlagerung"даги шерикларим билан танишганман. Дастлаб биз сайтни ўзаро фикр алмашиш ва футболга биз каби бошқа ракурсдан қарайдиганларни топиш учун ишга туширгандик. Аммо иш биз кутгандан ҳам омадлироқ бўлди ва олдимизда янги имкониятлар эшиги очилди, ўз-ўзидан вазифалар ҳам мураккаблашарди", – ёдга олганди Марич. Лойиҳа ўз фаолиятини бошлаётганда Рене ҳали 21 ёшга ҳам тўлмаганди.

Клублар Spielverlagerung асосчиларига рақиблар ёки клуб қизиқаётган ёш футболчилар ҳақидаги аналитик ҳисоботлар сўраб мурожаат қилар, уларни турли семинарларга таклиф қилишар ва тактик тайёргарлик борасида матнлар ёзиб беришни сўраганлар. Шундай қилиб, Марич Abseits.at сайти билан ҳамкорлик қила бошлади. 2012 йилдан буён бу сайт учун Spielverlagerung 523 материал ёзиб берди. "Бундан беш йил олдин, бугунги даражамга етишим ҳақида орзу ҳам қилмагандим", – деганди 2017 йил Марич Abseits"га берган интервьюси чоғида.

Марич ва унинг лойиҳаси (Spielverlagerung)га Томас Тухель ("Майнц"да ишлаган вақтлари) ва Рожер Шмидт ("Зальцбург") мурожаат қилган. "Тухель "Майнц"нинг Гвардиола "Бавария"сига қарши ўйини анализини ўқиб, бизга хат юборди. Хатда учрашувга таклиф қилинганди", – айтиб берганди Марич. Учрашув ижобий якун топди – Тухель блогерга "Майнц"нинг бўлажак рақиблари борасида материаллар буюртирди.

"Зальцбург"га ҳам Марич Spielverlagerung туфайли бориб қолди. 2016 йил январида Рене "Зальцбург"нинг ёшлар (18 ёшгача бўлган футболчилар) жамоаси ҳақидаги материални чиқаради. Ўшанда жамоани Марко Розе бошқарарди.

Ўша мақола ҳақида

Пост чиқарилгандан кейин Маричнинг ўзи Розега ёзади. "Мен ундан кўп нарса кутгандим, амалда у билан суҳбат кутганимдан ҳам қизиқроқ бўлди", – деб тан олади Марич. Кўп ўтмай ишга "Зальцбург" департаменти раҳбари Эрнст Таннер аралашади – у Маричнинг ёзганларини ва қўлланмаларини ўрганиб чиқади, Рене эса клубга ишга кириш ниятидалигини маълум қилади. Бу барчага мақул келди ва 2016 йил ёзида Марич Розенинг ёрдамчиси сифатида "Зальцбург U-19"да иш бошлайди.

Биринчи мавсум ажойиб ўтди. "Ред Булл" ёшлар ўртасида УЕФА Лигасида зафар қучди. Плей-офф босқичида Розе ва Марич "Вардар"ни умумий 8:0 ҳисобида, "Кайрат"ни (9:1), ва "Ман Сити"ни пенальтилар сериясида мағлуб этди.
Турнинг асосий босқичида "Зальцбург" ПСЖ (5:0), "Атлетико" (2:1), "Барселона" (2:1) ва "Бенфика" (2:1) жамоалари билан куч синашди. "Зальцбург" академияси турли ёш тоифасидаги жамоалар бир хил ўйин фалсафасини илгари суради. Мураббийлар қўллайдиган методикалар ҳам бир хил. Халқаро мусобақада ҳам биз клуб анъналаридан, иш услубидан воз кечмадик", – деганди мураббий.

2017 йил ёзида Розе ва Марич "Зальцбург"нинг асосий жамоасига ўтишади.

"Зальцбург" асосий жамоасида Марич ёш жиҳатидан ўзидан катта бир неча футболчилар билан рўбаро келди (сентябрда Рене 26 ёшга тўлади), лекин бу уни буткул хавотирга солмади: "Футболчилар сен уларга ёрдам беришинга ишонса, сен 18  ёшдамисан ёки 38 уларга барибир. Бундан ташқари мен ўзимни қулай хис қилишим учун икки сабаб бор. Биринчидан, таркибимизда кўплаб ёш футболчилар мавжуд. Иккинчидан, фаолиятим борасида қандайдир маълумот билиб қолишса, қизиқ-қизиқ саволлар беришади".

Марич футболчилар билан суҳбатда, Spielverlagerung мақолаларида ишлатадиган тил, усулдан фойдаланмаслигини таъкидлайди: "Менинг матнларим – кузатувлар натижаси, тушунчалар тили. Жамоа билан ишлаганда уларнинг саралаш ва иложи борича самарали тарзда етказиб бериш муҳим. Бу ҳаракатлар тили. Мен ҳеч қачон ўзимни журналист сифатида кўрмаганман, Spielverlagerung шунчаки машқ эди ва у атрофдагилар қизиқишига сабаб бўлди. Энди мен фақатгина тадқиқот, анализ билан шуғулланмаяпман, энди кейинги босқич – тўпланган маълумотни футболчиларга етказиб бериш билан ҳам машғулман.

Жамоа билан суҳбатда Рене бош мураббий Розенинг ролини алоҳида таъкидлаб ўтади: "У керакли сўзларни топа олади. У менинг энг яхши устозим. Баъзан амалиётдаги билимларим камроқлигини сезаман. Шунда мен мураббийлар штабимиз вакиллари ва хатто футболчиларга мурожаат қиламан. Бунда ҳеч қандай муаммони кўрмаяпман".

41 ёшли Розе ва 26 ёшли Марич ажойиб жуфтлик ҳосил қилишди. Марич – Гвардиола ва позицион футбол мухлиси, Розе эса "Зальцбург" прессинг ва контрпрессингга кўпроқ мурожаат қилишини таъминламоқда. "Менимча бу бир-бирига қарама-қарши нарсалар эмас. Мен келгунга қадар Розе U-18да ажойиб натижалар кўрсатган: унинг жамоаси чемпионатда умуман ютқазмади ва жуда кам гол ўтказиб юборди. Биз таркибимиздаги футболчилар имкониятидан келиб чиқиб тактика танлашга ҳаракат қиламиз, аммо шу ўринда улар универсал бўлиб, эркин ҳаракат қилишларини истаймиз".

Марич асосий жамоа ёрдамчиси сифатида биринчи мавсумини ўтказмоқда, лекин ундан ҳозирданоқ бош мураббий сифатида якка ўзи ишлаши ҳақида сўрашмоқда. Рене бу каби саволларга камтарона: "Бош мураббийдан кўпроқ нарса талаб қилинади. Бунинг учун мен кўплаб жиҳатларда ўсишим зарур. Одамлар билан ишлашда, муносабатда ва ОАВ вакиллари билан суҳбатда ҳам ўзимни қандай тутишни ўрганишим керак".

Ҳозирча Марич "Зальцбург"нинг иккинчи мураббийи ролига қаноат қилмоқда, аммо яқин келажакда у фаолиятидаги кейинги босқичга ўтса ажаб эмас. Европа Лигасидаги омадли иштирок ва Австрияда ички чемпионатда навбатдаги совриндан сўнг, Марко Розе Германия бундеслигаси қатор жамоалари қизиқишига сабабчи бўлди.

Катта эҳтимол билан Розе Дортмунд ёки Лейпцигга йўл олади. Агар шундай бўлса, Марич Австрияда қолиб кетмаслиги аниқ.

Нозима Зарипова таржима қилди