Илҳом Мўминжонов: "Олдимизга Про-лигада чемпион бўлиш ва кубокда имкон қадар узоқроққа бориш вазифаси турибди"

Ўйин ҳақида

- Кубок ўйинларига жиддий тайёргарлик кўрган эдик. "Қизилқум" жамоаси бугунги ўйин олдидан 6 очкога эга эди ва улар кейинги босқич масаласини ҳал этиб бўлишганди. Бизда ҳам имконият сақланиб турганди. Биз бугун ғалаба қозониб кейинги босқичга чиқмоқчи эдик. Лекин ўйин дуранг бўлди. Шундай бўлса ҳам 3-ўрин билан навбаидаги босқичга чиқдик. Хавфли вазиятларимиз бўлди, ярим ҳимоя ва ҳужум чизиғимизда ўйнаган футболчиларимиз унумли фойдаланишмади. Бугун қўлга киритилган бир очко ва навбатдаги босқичга чиққанимиз билан футболчиларимиз ва мухлисларимизни табриклайман. Энди қуръани кутамиз, агар Суперлига жамоалари билан тушсак яхши ўйнаб кейинги босқичларга чиқишимизга умид қиламиз. Футболчилар Суперлига жамоалари билан ўйнаб ўзларини синаб кўришга интилишмоқда.

- Кубок учрашувларида 3 та ўйинда жами 4 очко қўлга киритилди. Бу жамоа учун нормал холатми?

- Энди кубок учрашувларининг биринчи ва иккинчи турида биз асосан ўйин амалиёти кам бўлган футболчиларга имконият бердик. Раҳбарият бизга кейинги босқич вазифасини қўйган эди. Бугун гувоҳи бўлганларингдек, 3-турда барибир асосий таркибни туширдик. Чунки бу ўйин орқали Про-лиганинг навбатдаги турига тайёргарлик кўришимиз зарур эди. Биз навбатдаги босқич йўлланмасини қўлга киритдик, бу ютуқ билан барчани табриклайман.

- Бугунги ўйиндан келиб чиқиб айтсак, жамоангиз Суперлига клублари билан ўйнашга қай даражада тайёрлигини кўриб олдингиз?

- Айтиб ўтдим, кубок учрашувлари орқали Суперлига жамоалари билан ўйнаб ўзимизни синаб кўрмоқчимиз. Про-лигадан 3-4 клуб навбатдаги босқичга чиқди. Раҳбарият бизга ҳам кейинги босқич вазифасини қўйган, шундай экан чиқишимиз шарт эди. Олдимизга Про-лигада чемпион бўлиш ва кубок учрашувларида имкон қадар узоқроққа бориш вазифаси турибди.