Икром Алибоев ва "Сеул" клуби ўзаро ҳамкорликни тўхтатди

Ҳамюртимиз 2019 йил бошида Жанубий Кореянинг "Сеул" клубига кўчиб ўтган ва 3 йиллик шартномага имзо чекканди.  Кеча "Сеул" клуби инстаграмдаги расмий саҳифаси Икром Алибоев билан хайрлашув постини жойлади:  

"Алибоев билан шартномани бекор қилиш ҳақида

"Сеул" клуби аъзоси Икром Алибоев икки томонлама келишув асосида шартномани бекор қилди. "Сеул" клуби Алибоевнинг ўйинлари, натижалари учун миннатдорчилик билдиради. Унинг кейинги фаолиятида омад тилаймиз".


Бу борада Икром Алибоев билан боғландик ва унинг фикрлари билан қизиқдик.

"Клуб билан келишувни бекор қилишимнинг энг катта сабаби жароҳатим. Айнан шу жароҳат туфайли 7 ойни футболсиз ўтказдим. Бу мен учун ёмон, сабаби футболчининг фаолияти қисқа давом этади. Имкон борича кўпроқ ўйин ўтказишим керак. Шу боис клубдан кетишга қарор қилдим. Аслида шу йил охиригача шартномам бор эди ва клубда қолиб майдонга тушмай шунчаки маош олиб юрсам ҳам бўларди. Лекин бундай қилолмасдим ва клуб билан келишган ҳолда шартномани бекор қилдик.

Ҳозирча қайси жамоада ўйнашим аниқ эмас. К Лига клубларидан бирига ўтиш ниятидаман. Аслида К1 ёки К2 лига клуби бўладими бунинг катта фарқи йўқ. Агар шартнома туза олмасам яна ярим йил футболсиз қоламан. Шу сабабли жароҳатимдан тикланиб яна аввалги формага қайтишим учун ҳаракат қилишим зарур", - дейди Икром Алибоев championat.asia сайтига.