Қизиғи шундаки, 1998 йилги жаҳон чемпионатида ҳам Тунис ўзининг илк учрашувини Англияга қарши ўтказган ва 0:2 ҳисобида мағлуб бўлганди. Ўшанда Алан Ширер билан Поль Скоулз томонидан киритилган голлар инглизларга уч очко тақдим этган.
Ўша ўйин қатнашчиларидан бири Ҳотам Трабелси қарийб 20 йил олдинги баҳсни ёдга олди:
- "0:2 ҳисобида ютқазиб қўйганимиз ҳозир ҳам ёдимда. Ўшанда Англия таркибида жудаям кучли эди: Дэвид Бекхэм, Алан Ширер, Сол Кэмпбелл, Поль Скоулз каби футболчилар ўйнарди. Биз рақибдан ростдан қўрққандик".
- "Ҳозир ҳам Англия терма жамоаси ўзига яраша кучли, лекин 1998 йилги жамоада номдор ўйинчилар кўп эди. Ҳозир инглизларда техник футболчилар камайиб кетди, уларда меҳнаткаш футболчилар кўпроқ".
- "Лекин эндиликда Тунис терма жамоаси ҳам ўзгарди. Биз рақибдан қўрқмайдиган бўлдик. Ўйлайманки, жаҳон чемпионатида Тунис терма жамоаси ҳам ўзини кўрсата олади. Балки биринчи ўйиндаёқ Англияга сюрприз тайёрлармиз".
