Григорий Колосовский: “Ғалаба голимиз ҳам чиройли, ҳам муҳим бўлди”

Ўйин ҳақида

- Албатта “Пахтакор”га қарши ўйинлар осон ўтмайди. Биринчи бўлим гол ўтказиб юбордик ва бу бизга қатор қийинчиликларни олиб келди. Иккинчи бўлимда фаолликни оширдик. Биласизми, Самвел Бабаян даволаниш курсларидан сўнг бизга тегишлича маслаҳатларини берди. Ўйинни назорат қилишга интилдик. Ғалаба голимиз ҳам чиройли, ҳам муҳим бўлди. Қийин ўйин, рақибдан келиб чиқсак, бу аввалдан маълум эди. Ғалаба бизга навбатдаги ўйинлар олдидан қўшимча иштиёқ тақдим этса, ажаб эмас.

- Бугунги ўйинга танланган услуб кейинги учрашувларда ҳам қўлланиладими?

- Иш берган услубларни албатта амалиётга жорий қиламиз. Ўйин ташкил этиш борасида Самвел Бабаяннинг маслаҳатлари бугун бизга фойда келтирди. Иккинчи бўлимда фаоллигимиз ортди, 4 та қулай имкониятга эга бўлдик. Ҳозир муҳими, ким асосий таркибга муносиб, ким захирада қолиши керак, аниқлаб олдик. Захирадан тушиб ҳам жамоага катта фойда келтирадиган футболчилар бўлади.

- Аввалги учрашувда ҳам жамоа сўнги дақиқаларда гол ўтказиб юборганди. Бугун ҳам шундай бўлди. Келгусида бунинг олдини олиш учун қандай режаларингиз бор?

- Хатолар устида ишлаймиз. Иштиёқни янада ошириш учун ҳаракат қиламиз. Сўнгги дақиқаларда гол ўтказиб юбориш бу - якуний натижанинг салбий кўринишига сабаб бўлади. Биз ҳар доим ғалабани ҳоҳлаймиз. Кетма-кет 4 та ўйинда биз ғалабага ҳақли ўйин намойиш этгандик.

- Иван Йосович сўнги ўйинларда кўринмаётганига изоҳ берсангиз?

- Йосович жароҳатидан даволаш амалиётини олиб бораяпти. Майдонга қайтиши унинг қанчалик тез тикланишига боғлиқ.