Аввалроқ нидерландиялик мутахассис шундай деган эди: "МЮ яна ғалаба қозонишини жуда хоҳлайман, аммо бунинг учун компетентли раҳбарият ва стратегия керак. Мураббийни истеъфога чиқариш муаммони ҳал қилмайди, бу эмоцияларга берилиб қабул қилинган қарор". Эрик шунингдек, клуб муҳим ваъдани бажармаганини ва "ўйинчиларга ваколат бериб, токсик маданиятни қўллаб-қувватлашаётганини" таъкидлаган эди.
— Клуб раҳбарияти томонидан қўллаб-қувватлашни ҳис қиляпсизми?
— Ҳа, албатта. Нима учун ҳис қилмаслигим керак? Мен ўз ўрнимдаман, клубдаги барча билан яхши, ҳақиқатан ҳам жуда яхши муносабатдаман. Бу борада ҳеч қандай муаммо ёки қийинчилик йўқ. Бизнинг вазифамиз — ўйинларда ғалаба қозониш, биз айнан шунга интилмоқдамиз.
Манга ҳеч қандай ишонч билдирувчи кафолатлар керак эмас. Ҳаммаси шундоқ ҳам тушунарли. Мен ўз ролимни ва мажбуриятларимни биламан. Ишлар яхши кетаётганда ёки ниманидир яхшилаш керак бўлганда, кимдир бу ҳақда менга айтиши ёки кўрсатиб беришига ҳожат йўқ. Мен буни ўзим ҳам жуда яхши тушунаман. Ишларнинг асл ҳолатини англаб турибман ва бу борада менда ҳеч қандай муаммо йўқ. Бу шунчаки [тен Хагнинг] шахсий фикри.
Бизда [спорт директори] Джейсон Уилкокс, [ижрочи директор] Омар Беррада, хўжайинлар ва, албатта, ўйинчилар билан очиқча суҳбатлар бўлиб туради. Сиртдан ҳаммамиз бир йўналишда ҳаракат қилишимиз жуда муҳим.
— Тен Хаг клубда токсик муҳит ҳукм сурганини айтди.
— Йўқ, ундай эмас эди. Мен қайтганимдан бери — аниқ ундай эмас. Ўйинчилар, мураббийлар штаби — ҳамма бор кучини бериб ишламоқда.
Яхши ўйинлар бўлди, яхшироқ ўйнашимиз мумкин бўлган ва устида ишлайдиган жиҳатларимиз бор учрашувлар ҳам бўлди; хатолар ҳам учраб турди. Футбол шундай, бу ўйинни яхшилашга қаратилган жараённинг бир қисми.
Аммо шуни айтишим керакки: агар сизда ҳақиқатан ҳам жипслашган жамоа бўлмаса — ва мен ҳозир маҳорат даражаси ҳақида эмас, балки йигитлар ўтган дам олиш кунларида ўзларини қандай кўрсатишгани ҳақида гапиряпман — натижага эришиб бўлмасди. Жамоада жуда катта бирдамлик, яхшироқ бўлишга бўлган улкан иштиёқ ва бир-бири учун майдонда бор кучини беришга тайёрлик ҳис қилиниб турибди.
Шу сабабли бу борада, жамоага келсак, мен, шубҳасиз, қанчалик жипслашганимиздан жуда мамнунман, — деди Кэррик.
