Голландлардан иқтидорларнинг навбатдаги "партияси"

Мутахассисларнинг фикрича, мамлакатда ёш иқтидорлар етишиб чиқиши аввалгига нисбатан кескин камайган.

Авваллари Топ чемпионатлар грандларигина алвон лолар юртидан иқтидорли ёшларни ўз таркибига жалб эта олган бўлса, бугунги кунга келиб, ўртамиёна жамоалар ҳам Голландиядан ўсиши кутилаётган футболчиларни илиб кетишмоқда ва ушбу трансферлар доим ҳам ўзини оқламаяпти.

Яна бир эътиборга лойиқ жиҳат шуки, авваллари фаолиятини якунлашга яқин келиб қолган голландлар она юртига қайтмасди. Ҳозир эса миллий чемпионатда уларга ҳам жой топилмоқда. Бир тарафдан Хунтелар яна “Аякс” формасида голлар ураётгани яхши, аммо бу иқтидорлар хаттоки ёши ўтиб қолган Хунтелар билан ҳам рақобатлаша олмайётганидан далолат. Ҳужумчилар етишмовчилигини чемпионат тўпруралари баҳсидаги курашга қараб ҳам билиб олиш мумкин.

Икки-уч йил аввал чемпионат тўпурари деярли ўттизта тўпни рақиблар дарвозасига жойлаб қўйган бўлса, ҳозир... Биринчидан, энг яхши тўпурар “Виллема II” жамоаси футболчиси бўлиб қолди. Иккичидан, унинг ҳисобида бор йўғи 16 гол мавжуд. 

Ва яна бир гуруҳ футболчилар ҳисобида 14-15 тадан гол мавжуд.

Шунга қарамай, топ чемпионатнинг топ клубларини кучайтира оладиган футболчиларни излаб топишга муваффақ бўлдик. Яқин келажакда бу футболчилар учун трансфер бозорида кескин кураш бошланса ажабмас.

Матейс де Лигт (“Аякс”)
Шартномаси 2021 йилгача мўлжалланган, нархи – 25 млн евро (бу ерда ва кейингиларида Transfermarkt маълумотлари асосида)

Кутилмаганда, Голландия чемпионатининг энг қиммат футболчиси марказий ҳимоячи бўлиб турибди. Аммо бунга хайрон бўлмасангиз ҳам бўлаверади. Матейс эндигина 18 ёшда ва бунга қарамай, катта тажрибали футболчилардек ҳаракат қилмоқда. Умуман олганда сўнгги вақтларда Голландияда де Лигт каби омма эътиборига тушган  курашувчан, ақлли ва универсал ҳимоячилар авлоди етишиб чиқди.

Де Лигт бу борада ёшлардан бироз каттароқ, аммо умумий картинада ёш ҳисобланган ван Дейк ва де Врейнинг вориси десак бўлаверади. Футболчи қобилиятли экани сезилиб турибди. “Манчестер Сити” шарофати билан эса ҳимоячилар ҳам катта суммага трансфер қилинадиган бўлиб қолди. Демак, де Лигт ва ҳимоя чизиғининг бошқа вакиллари ўз устиларида ишлашдан тўхтамасликлари зарур.

Ирвинг Лосано (ПСВ)
Шартномаси 2023 йилгача мўлжалланган, нархи – 22 млн евро

Яқин орада бошқа клубга ўтиб кетиши мумкинлар орасида ПСВ вингери ҳам етакчилардан бири ҳисобланади. Ирвинг бу мавсум жамоаси билан мамлакат чемпионлигини қўлга киритди. Эйндховен жамоаси ўтган ёз Лосанони мексиканинг “Пачука”сидан 8 миллион еврога сотиб олганди. Ҳозир ПСВнинг энг яхши тўпурари (мавсумда 15 гол ва 12 та голли пас берган йигит)ни кўплаб топ-клублар “Арсенал”дан тортиб Дортмунднинг “Боруссия”сигача ва хатто “Манчестер Сити” ҳам кузатмоқда.

Трансфернинг таҳминий нархи эса 60-70 миллион евро атрофида бўлиши кутилмоқда. Бу бугунги кун иқтисодиётидан келиб чиқсак нормал нарх, чунки мексикалик футболчи бор йўғи 22 ёшда, футболчининг клуб билан 2023 йилгача амал қиладиган шартномаси бор ва Ирвингнинг универсаллиги кўплаб жамоаларнинг ҳужум чизиғида исталган нуқтасида фойда келтириши мумкин.

Каспер Долберг (“Аякс”)
Шартномаси 2021 йилгача мўлжалланган, нархи – 14 млн евро

Долберг билан боғлиқ вазиятда “Аякс” менежменти узоқни кўзламай қарор чиқарди. Даниялик ўтган мавсум катта саҳнага чиққанди. Амстердамликлар Европа Лигаси финалига қадар етиб боришди ва ўша жамоанинг етакчиларидан бири шубҳасиз Долберг эди. Европанинг машҳур жамоалари қизиқишига қарамай, “Аякс” бошлиқлари футболчини қўйиб юборгиси келмади ва Касперни яна бир-икки мавсум Голландия чемпионатида қолиб, кейин топ жамоага йўл олиш тўғри қарор бўлишига ишонтиришди, аммо... Ҳозирча бу режа ўзини оқламаяпти.
Ўтган мавсум Долберг Голландия чемпионати 29 ўйинида майдонга тушиб, 16 та гол урди ва 6 бор голли пас берди, Европа Лигасида эса яна олтита гол уришга эришди. Бу мавсум эса футболчи жароҳатлар домига тушиб қолди ва оптимал спорт формасини тиклай олмаяпти – 20 ўйинда 5та гол.

Шунга қарамай, скаутлар Долбергни кузатишда давом этмоқда. Чунки футболчи жуда ёш (20) ва ақлбовар қилмас потенциал соҳиби. Жароҳатлардан қутулиб, иқтидоридан тўғри фойдаланса жаҳон юлдузи чиқиши ҳеч гап эмас. Унчалик омадли бўлмаган бир мавсумни деб скаутлар Долбергни ўз рўйхатларидан ўчириб юборишмагани аниқ.

Жастин Клюйверт (“Аякс”)
Шартномаси 2019 йилгача мўлжалланган, нархи – 7,5 млн евро
Клюйверт яқин-яқин вақтларда асосий таркибдан муқим ўрин ола бошлади ва клубдагиларнинг ундан умиди катта. Бир-икки йил аввал кўпчилик унинг амстердамликлар ёшлар таркибидаги ҳаракатларидан хайратланиб юрганди. Ҳозир ўтмишнинг машҳур футболчиси Патрик Клюйвертнинг ўғли катта футболга шаҳдам қадам билан кириб келмоқда ва 18 ёшлигига қарамай, йўқолиб қолмаяпти. Истаймизми, ёки йўқ унга бошқа топ клублардан эътибор бўлишининг сабабларидан бири албатта унинг машҳур фамилияси, аммо Жастин шунга яраша иқтидорли ва майдонда кўп фойда келтира олади.  

Клюйвертнинг сотиб олиниши янги жамоасига нафақат иқтидорли ёш футболчини балки маркетинг борасида ҳам яхшигина фойда келтиради. Албатта, оддий бир умидли ёш иқтидор соҳибини сотиб олинганидан кўра кўпроқ эътибор бўлади бу трансферга. Бу мавсум Голландия чемпионати доирасида Клюйверт 27 ўйинда майдонга тушди, 8та гол урди ва 5 бор шерикларига голли узатма етказиб берди. Юксак иқтидор соҳиби, аммо рўйхатдаги бошқа футболчилардан кўра, узоқро вақт Амстердамда қолса ажабмас. 

Давид Нерес (“Аякс”)
Шартномаси 2021 йилгача, нархи – 15 млн евро

“Аякс” ва голланд футболида кам учрайдиган ҳолат. Нерес ўтган ёз “Сан-Паулу”дан нисбатан қимматга сотиб олинган. Амстердамликлар ҳар бир тийинни ҳисоблаб юрадилар ва ўша голландлар Нерес учун 12 миллион евро сарфлашга қарор қилдилар. Бу клуб тарихидаги иккинчи энг қиммат трансфер. Энди Давиддан клуб қанча пул ишламоқчилигини ўзингиз ўйлайверинг. Ва таъкидлаш лозим, ҳозирча таҳминлар ўзини оқламоқда. Нереснинг нархи ошиб бормоқда ва уни Европа топ-клублари кузатишмоқда. Рўйхатда Лондоннинг “Тоттенхэм” ва туриннинг “Ювентус” жамоалари борлигининг ўзи футболчига жиддий қарашимизга сабаб бўла олади. 

Нерес бу мавсум жамоа етакчиларидан бирига айлана олди, Голландия чемпионатида 29 ўйинда майдонга тушиб, 11 та гол урди ва 12 бор голли узатма етказиб берди. Яқин орада уни ҳам бошқа бир чемпионатда кўрсак ажабмас.

Кўриб турганингиздек Голландияда иқтидорлар камайган бўлиши мумкин, аммо улар ҳамон топилади...

Нозима Зарипова таржима қилди