Финалгача... ФОТО

Айни пайтда жамоалар стадионга етиб келишган ва майдонда ўйинолди чигалёзди машқларни бажаришмоқда.

Шота Арвеладзе бугун ҳам жамоанинг анъанавий тактикасига содиқ қолган ҳолда 4-2-3-1 схемасини танлаган. Охирги ўйинларда жароҳати боис ўтказиб юборган Аъзамов яна ҳимоя марказига қайтди. Егор Кримец финални захира ўриндиғида бошлайди. Шунингдек, таркибда яна бир ўзгариш руй берган. Таянч зонаси вакили Азим Аҳмедовнинг ўрнини бугун марказда Владимир Козак эгаллайди. Қолган нуқталар борасида ҳеч қандай ўзгариш ёки янгилик йўқ.

АГМК эса ўйинни 4-3-3 тактик схемасида бошлайди. Ашурматов жамоаси ўйин боришига 4-3-3 схемани 4-2-3-1 ёки аксинча, вазиятга қараб ушбу жойлашувни баҳс давомида 4-3-3га айлантириб ўйнаши мумкин. Ҳимоя марказида Касминин ва Бубанья тандемига ишонилган. Қанотларда Исроилов ва Хожиакбаров ўйнайди. Марказ Жокич-Тўраев-Қиличев "учлиги"га топширилган. Қанот вингерлари сифатида одатдагидек Ҳасанов ва Пиримов ўйнашади. Марказий ҳужумда эса Камолиддин Мурзоев баҳсни бошланғич таркибда бошламоқда.

Финал учрашувига кириш чиптаси текин. Мухлислар ташрифи эса кутилганидек юқори эмас. Ҳозирча стадионга тахминан 3-4 мингдан зиёдроқ ишқибозлар ташриф буюришган. Мухлисларнинг финал олди кайфиятлари анча кўтаринки ва улар бугунги баҳсдан ҳақиқий финалга хос ўйин ва шунга муносиб шукуҳни кутишмоқда.

Тошкентдан ва Олмалиқдан бир гуруҳ мухлислар келишган ва улар ўзгача кайфиятда ўз суюклиларини қўллаб-қувватлаш учун ҳозирлик кўришмоқда.

Стадионга йиғилган мухлислар учун айни пайтда стадионда маҳаллий санъаткорлар куй-қўшиқларини тақдим этишмоқда.