Файзулла Қамбаров: “Навбаҳор” ҳали кўп жамоаларга “бошоғриқ” бўлади”

— “Навбаҳор”га қарши ўйин кутганимиздан-да оғир ўтди, — дейди Файзулла Қамбаров. — Уларнинг бежизга охирги турда “Насаф”дан очко тортиб олмаганлигини амалда гувоҳи бўлдик. Мураббийлар менга украиналик легионер Александр Пишчурга қарши эҳтиёт бўлиб ўйнашим зарурлигини таъкидлашганди. Ўйин давомида буни уддаладим, деб ўйлайман.

Рақибимизда ҳам, бизда ҳам жуда кўплаб хавфли вазиятлар юзага келди. Охирги дақиқаларда босимни оширганимиз, жамоа бўлиб олдинга ташланганимиз уларни хато қилишга мажбур қилди. Якунда муҳим ғалабани қўлга киритдик. Бизга қарши “Навбаҳор” таркибида Хайрулла Каримов, Дилшод Жабборов каби тажрибали ўйинчилар майдонга тушмади. Агар улар тўлиқ таркиб билан майдонга чиқишса, ҳали кўп жамоалар учун етарлича “бошоғриқ” бўлиши тайин.

“Қизилқум” ПФК Матбуот хизмати