Фарғонада "Ўқитувчи ва мураббийлар куни"га бағишланган футбол мусобақаси бўлиб ўтди

Жами 19 та туман ва шаҳар жамоалари иштирок этган мазкур мусобақа томошабоп учрашувларга бой тарзда ўтди.

Фарғона вилоят ҳокимлиги, Фарғона вилояти жисмоний тарбия ва спорт бошқармаси, Фарғона вилояти Футбол Ассоциацияси ва бошқа мутасадди ташкилотлар ташаббуси остида ташкил этилган мазкур мусобақанинг финал учрашувида Олтиариқ ва Сўх тумани жамоалари тўқнаш келдилар. Қизиқарли ва кескин курашларга бой тарзда ўтган финал баҳсида олтиариқликлар 3:0 ҳисобида ғалаба қозондилар.

Ушбу натижадан сўнг Сўх тумани жамоаси иккинчи ўринни қўлга киритган бўлсалар, Марғилон шаҳри ва Учкўприк тумани жамоалари мусобақанинг учинчи ўринига лойиқ деб топилди.

Финал учрашувидан сўнг мутасадди ташкилотлар вакиллари иштирокида мусобақа қатнашчиларига диплом ва эсдалик учун совғалар топширилди.

Умуман олганда, "Ўқитувчи ва мураббийлар куни" муносабати билан ташкил этилган мазкур мусобақа кўтаринки кайфиятда ташкил этилди.

Бекзод Толибов, Фарғонадан махсус