Эшитдик-да: ОФК Кубогида ўйнаши мумкин бўлган "Насаф" тарқаб кетиши мумкин

Аввалги йиғинда керакли тиббий воситаларни ўз киссасидан олиб машғулотларни давом эттирган Рўзиқул Бердиев ва унинг мураббийлар штаби 2021 йилда ишлайдими, йўқми, буни ўзлари ҳам билмайдилар. Сабаби клубдаги аксарият ходимлар билан шартнома ўз якунига етган. Мураббийлар ҳар қанча қийинчиликка чидашга рози. Аммо шартнома муддати тугаган футболчиларнинг совчилари жуда кўп ва улар бу аҳволда "Насаф"да фаолиятларини давом эттиришлари сўроқ остида турибди. Чунки клубда янги мавсум учун ҳеч қандай шароит яратилмаган.

Ўринбосарлар таркиби ҳали йиғилмаган. Жамоанинг ошхонасида овқат тайёрлаш учун маҳсулот тугаб бўлган. Футболчилар аллақачон ўзларига янги жамоа излашга тушиб кетишган. Агар шундай бўладиган бўлса, АГМК ОЧЛга чиққан тақдирда, "Насаф" ОФК Кубогида иштирок этади. Аммо бундай ҳолатдаги тайёргарлик билан Ўзбекистон учун муҳим бўлган очколар бой берилади ва кейинги 2 йил учун яна халқаро майдонлардаги квоталаримиз тушиб кетади.

Бир неча йил аввал "Машъал" клуби мана шундай тарзда қурбон қилинди ва бугун ўзбек футболи истеъдодларни етказиб берувчи асосий манбаларидан биридан айрилди. "Насаф" билан ҳам шундай вазият содир бўлса бундан ҳеч ким ютмайди.

"Насаф"га ёрдам беринглар!