Эронлик журналист: "ОФК чиқарган қарор футболни ўлдиради"

Бунга сабаб унинг гол урганидан кейин ўз голини кўзини қисиб нишонлагани бўлди. "Пахтакор"га қарши ОЧЛ чорак финалида иккита тўп киритган Ал Касир ҳар иккала голини камералар қаршисига бориб шундай нишонлади. У аввалги босқичда ҳам ўз голини шундай нишонлаганди. 

Шундан сўнг ОФК бу футболчининг қилиғини ирқчиликка йўйиб 6 ой муддатга ҳар қандай футбол фаолиятидан четлатиш билан бирга 10 минг доллар жарима тортди. Иса Ал Касир ОЧЛ 1/2 финалида "Ал Насср"га қарши майдонга тушишга ҳозирлик кўраётганди, бироқ қарорнинг айнан ўйин бошланишига саноқли соатлар қолганида эълон қилиши жуда ғалати бўлди.

Шундан сўнг Эрон матбуот "портлади" ва мамлакатдаги футболга оид ҳар бир нашр бу ҳақда ёза бошлади. Хусусан tehrantimes.com мухбири Масъуд Ҳоссейн шундай ёзади: "Эроннинг энг кучли клубларидан бири ОФКнинг бу қароридан шок ҳолатига тушди. Чунки спортга хос бўлмаган қарор қабул қилинди. Ҳаммамиз биламизки, Ал Касир қачон гол урса голларини шу тарзда, яъни кўзини қисиқ кўрсатган ҳолда нишонлайди ва бу билан у ҳеч кимни камситмоқчи эмас. Ал Касир голларини жияни Микаэлга бағишлаб келади. У Эрон чемпионатида урган голларидан кейин ҳам шундай "қилиқ" қилади". 

"Тўғри, ОФК бошқача хаёлга борган бўлиши мумкин, лекин футболчининг Эрон чемпионатида голни нишонлаган олдинги суратларини кўринг. У доим шундай қилган. Балки ОФК наздида бу бировни таҳқирлаш бўлиб кўринган бўлса керак. 2008 йилги Олимпия ўйинларида испаниялик баскетболчилар ҳам шундай қилишганди, лекин ўшанда ҳеч ким уларга чора кўрмаган. "Персеполис" ОЧЛ ўйинларида ҳеч қайси клубга нисбатан ғаразгўйлик қилмади. Жамоа қийин босқичдан ўтиб финалга қадар етиб келди. Лекин айнан ярим финал ўйини куни қарор чиқарилиши шубҳали. Хуллас, ОФК чиқарган қарор футболни ўлдиради".