Эрон ФФ президенти: "Хавотирга ўрин йўқ, Кейруш Эронда қолади"

Меҳди Таж матбуот вакиллари билан суҳбатда шундай деди: "Сизларга бир гапни айтмоқчиман, Карлуш Кейруш Осиё Кубоги-2019 мусобақасида ҳам терма жамоада қолади. Жаҳон чемпионатидаги ўйинимиз шуни кўрсатдики, биз тўғри йўлдан кетяпмиз. Йўқса терма жамоа мамлакатга қайтганида 7 минг ишқибоз аэропортга чиқмасди".

"Миллий терма жамоа ҳамма нарсадан устун. Миллионлаб халқимиз жаҳон чемпионатини катта қизиқиш билан кузатиб борди ва футболчилар кўрсатган ўйин барчага манзур бўлди. Мусобақадаги ижобий иштирокдан кейин ҳаммамиз бир хаёлга бордик, бу ўйин билан бемалол Осиё Кубогида зафар қуча оламиз".

Маълумки, португалиялик мураббий ЖЧ-2018да қандай натижа қайд этилишидан қатъий назар, мундиалдан кейин Эрон билан хайрлашишини айтиб ўтганди. Аммо федерация раҳбари бошқа гапни гапиряпти.

"Хавотирга ўрин йўқ, Кейруш терма жамоада қолади. Биз унинг янги шартномасини яқин кунларда кўриб чиқамиз. Мана кўрасизлар, Осиё Кубогига ҳаммамиз биргаликда борамиз", - дейди Меҳди Таж.

Маълумот учун, Карлуш Кейруш 2011 йилнинг 4 апрелидан бери Эрон термасини бошқариб келмоқда. Унинг қўл остида форслар икки бор жаҳон чемпионати, бир марта Осиё Кубогида иштирок этишди.

Шу ўринда бизга тааллуқли савол жавобсиз қоляпти: агар Кейруш ҳақиқатан Эронда қоладиган бўлса, унда Ўзбекистон миллий терма жамоасини ким бошқаради?

Х.Холиқов.