Элдорбек Суюнов муваффақиятли операция қилинди

Бугун Туркиянинг Истанбул шаҳридаги шифохонада ўнг оёқ тиззасини операция қилдирган Элдорбек Суюновнинг жарроҳлик амалиёти муваффақиятли ўтди.

Қайд этиш керакки, яқиндагина чап қўли кичик панжасини синдириб олган дарвозабон жамоа машғулотларига қайтгач аввалдан безовта қилиб келган ўнг оёқ тиззасидаги оғриқ қайталанган. Шундан сўнг дарвозабон мазкур жароҳатдан тўлиқ фориғ бўлиш мақсадида жарроҳлик амалиётини ўтказишни маъқул кўрди. Бир соат аввал якунланган жарроҳлик амалиёти муваффақиятли ўтди.

Суперлиганинг ўтган мавсумдаги энг яхши кипери бўлган Элдорбек Суюнов тахминан 1,5 ой ичида, аниқроғи март ойи бошларида сафга қайтиши кутилмоқда. Дарвозабон "Пахтакор"нинг ОЧЛ плей-офф босқичидан ўрин олган Ироқнинг "Эйр Форс" жамоасига қарши ўйинни ўтказиб юборади.

Эслатиб ўтамиз, бундан аввал 2015 йилги мавсум якунланганидан сўнг Элдорбек Суюнов Москвада чап оёқ тиззасини операция қилдирганди. Бу сафар эса ўнг оёқ тиззасидаги жароҳатидан тўлиқ фориғ бўлди.