Эксклюзив! Тимур Кападзе: "Мақсадимиз бор ва унга қараб интиламиз"

Кеча ана шу баҳс олдидан матбуот анжумани ўтказилганми ёки йўқлиги ҳақида маълумотлар йўқ эди ва шу сабаб сайтимизда бу ҳақда хабар ҳам чиқди.

Нега Тимур Кападзенинг Испанияга қарши ўйин олди ташкил этилган матбуот анжуманидаги фикрлари ҳеч бир ўзбек ОАВсида чиқмади?

Биз ана шу масалага ойдинлик киритишга уриниб кўрдик. Олган маълумотларимиз кўра, Олимпиаданинг футбол беллашувларида ўйиндан олдин матбуот анжумани ўтказилмас экан. Фақатгина финалдан олдин матбуот анжумани бўлиб ўтар экан. Кеча Кападзе иштирокида ҳам анжуман ўтказилмаган. Испания эса ўзининг ташаббуси билан видео конференция шаклида матбуот анжумани ўтказган.

Сайтимиз ўқувчилари учун бугунги тарихий кун олдидан бош мураббийимизнинг фикрлари қизиқ эканлигини инобатга олган ҳолда Тимур Кападзе билан боғланишга уриниб кўрдик. Кападзенинг "Championat.asia" сайти учун берган ўйинолди эксклюзив фикрларини эътиборингизга ҳавола этамиз.

"Кайфиятимиз яхши, энг асосийси йигитларни ҳаммаси соғ-саломат, жароҳатлар йўқ. Тайёргарлик жараёни кўнгилдагидек ўтди ва ўйинга тайёрмиз.

Бугун очилиш ўйини, биз учун тарихий кун ва буни жуда яхши ҳис қилиб турибмиз. Айнан бугунги беллашув энг муҳимларидан дейиш мумкин, бундан ташқари олдимизда гуруҳдаги яна иккита ўйинимиз ва финалгача олсак умумий 6 та учрашувимиз бор. Олдимизга қўйган мақсадимиз бор ва унга қараб ҳаракат қиламиз, интиламиз.

Испания кучли ва ҳурматга сазовор жамоа, лекин биз ҳам ўз кучимизга ишонамиз. Яхши тайёрландик дея оламан, қолганини ўйинда кўрамиз", - деди Кападзе сайтимизга берган эксклюзив интервьюсида.

ОЛИМПИАДАГАЧА. Испания ОТЖ ҳақида нималарни билишимиз керак ёхуд "Қизил фурия" билан танишамиз