Драган Черан: "Бу бизнинг ўйин бўлди"

"Пахтакор" жамоаси ОЧЛ 5-тури доирасида "Шабаб Ал Аҳли" билан дуранг (0:0) ўйнаганидан хабарингиз бор. Учрашувдан кейинги матбуот анжуманида Шота Арвеладзе айтиб ўтган фикрларни олдинроқ келтириб ўтгандик.

Шота Арвеладзе: "Ғалаба қозонишни хоҳласангиз, рақибдан кўпроқ гол уришингиз керак"

Унда бош мураббийга кечаги баҳснинг энг яхши ўйинчиси деб топилган Драган Черан ҳамроҳлик қилди. Қуйида сербиялик футболчининг фикрларини эътиборингизга ҳавола этамиз.

Д.Черан: "Биз ўйинни тўлиқ назорат қилдик. Бугун фақат биз ўйнадик, бу бизнинг ўйин бўлди. Жуда кўплаб имкониятларни юзага келтирдик, аммо улардан фойдаланишда хатоларга йўл қўйдик. Бугун биз икки очкони бой бердик деб ўйлайман".

- Биз рақибни ўрганганимиз сингари улар ҳам бизни ўрганишади. Кучли тарафларимизни ёпишга уринишади. Улар қанотдан ўтишимизни ёпмоқчи бўлишди, биз марказдан ҳам ҳужумлар уюштирдик. Вазиятлардан фойдаланмадик ва рақиб ҳам ҳимояда яхши ўйнашга уринди. Бу гол ура олмаганимиз сабаби.