Достонбек Ҳамдамов: "Номзодлар қаторидан ўрин олганим ёқимли совға бўлди"

Номзодлардан бири “Бунёдкор” клуби ярим ҳимоячиси Достонбек Ҳамдамов бу ҳақда ўз фикрлари билан ўртоқлашди.

“Номзодим йилнинг энг яхши ёш футболчилари қаторига қўйилганидан жуда ҳам хурсандман. Бу мен учун кутилмаган ва ёқимли совға бўлди десам ҳам бўлади”, - дея гап бошлади Достонбек.

- Айнан ниманинг эвазига ушбу рўйхатдан ўрин олдим деб ўйлайсиз?
- Янги Зеландияда бўлиб ўтган ёшлар ўртасидаги мундиалда Ўзбекистон терма жамоаси билан чорак финалга қадар етиб бордик. Шу сабабли ўзбекистонлик уч нафар футболчининг номзоди қўйилган бўлса керак. Бу даражага эришишимда жамоадошларимнинг ёрдами ҳам жуда катта бўлганини таъкидлашни истардим.

- Сизлардан ташқари яна қайси ўзбекистонлик футболчининг номзоди ушбу номинацияга қўйилишга ҳақли эди?
- Ўзбекистондан жуда кўп иқтидорли ва қобилиятли ёшлар бор. Ҳеч бир жамоадошимни ранжитиб қўйишни истамайман, Ўзбекистон ёшлар терма жамоасида ўйнаган барчани кучли футболчи деб биламан. Мамлакатимизда футболга қаратилаётган эътибор жуда ҳам катта. Бунинг самараси халқаро майдонларда кўзга ташланмоқда.

- Агар совринни қўлга киритсангиз уни кимга бағишлайсиз?
- Агар худо хоҳласа совринни қўлга киритсам уни авваламбор ватанимга, ота-онамга ва менга яқиндан ёрдам берган мураббийларимга бағишлайман. Дўстларим Забиҳилло Ўринбоев ва Элдор Шомуродовга ҳам омад тилайман.