Диёр Туропов: "Албания билан оддий учрашув бўлмади"

2:0 ҳисобида Ўзбекистон жамоаси ғалабаси билан якунланган учрашувдан сўнг термамиз вакили Диёр Туропов "CА" сайтига фикрларини билдириб ўтди.

"Ушбу баҳс оддий назорат учрашувидек бўлди деб айта олмайман. Айнан мана шу Ўзбекистон U-22 жамоаси шаклланмоқда. Биз ҳам ўз хатоларимизни кўрдик. Ҳар икки жамоа бор кучи билан ўйин кўрсатди ва кескин бўлди.

Албания Европа жамоаси ва бу рақибни кучсиз деб бўлмайди. Уларни барча футболчилари жисмоний бақувват экан. Рақибимизнинг барча ҳужумлари юқоридан бўлди ва бош билан ўйнашга ҳаракат қилди. Биринчи бўлимда кўплаб имкониятлардан фойдалана олмаган бўлсак ҳам кучли ўйин кўрсатдик. Иккинчи бўлим асосан майдон марказида кечди ва ҳар икки томондан бир хил имкониятлар бўлди. Киритилган иккинчи гол эса ўйин тақдирини ҳал этди.

Тайёргарликни юқори даражага олиб чиқиш учун кунига бир маҳалдан машғулотлар олиб бормоқдамиз. Кейинги икки учрашувда ҳам чиройли ўйин кўрсатиб , ўз имкониятларимизни билиб оламиз" , - дейди Диёр Туропов