Даврон Файзиев: “Уч кун ичида иккита жиддий рақиб билан ўйнаш осонмас”

—Мезбонларни ғалаба билан табриклайман, — дея сўз бошлади Даврон Орипович. — “Қизилқум” юқори савиядаги ижрочиларга эга жамоалардан саналади. Шунга қарамай, биз Навоийдан ҳеч бўлмаса бир очко олиб кетиш илинжида келгандик. Афсуски, уч кун ичида кетма-кет икки жиддий рақибга қарши ўйнаш осон эмас. “Насаф” билан ўйинда учралган йирик ҳисобдаги мағлубиятдан сўнг, йигитларимизнинг ўзларига келиши қийин бўлди.

Ҳимоядаги палапартишликдан рақиб ҳужумчилари унумли фойдаланишди. Умуман олганда, йигитларимиз майдонда ёмон ҳаракат қилишмади. Гарчи, уларнинг хатти-ҳаракатидан кўнглим тўлган бўлса-да, якуний ҳисоб барибир дилимизни хира қилди.

Нима деймиз, ҳаёт давом этади. Бу — футбол! Жиззахда истеъдодли ёшлар улғайишмоқда. Уларнинг келажаги учун ҳам ишлашимиз керак. Энди жамоамиз таътилга чиқади. Декабрнинг  иккинчи ярмидан янги мавсум тайёргарлигини бошлаймиз.

“Қизилқум” ПФК Матбуот хизмати.